ഡീസല്‍ ടാങ്കര്‍ മറിഞ്ഞ് കിണറുകളില്‍ ഇന്ധനം ചോര്‍ന്ന പെരിന്തല്‍മണ്ണ അങ്ങാടിപ്പുറം പരിയാപുരത്ത് ഇന്ധനം കത്തിച്ച പ്രദേശത്ത് വെള്ളിയാഴ്ചയും അഗ്നിശമന സേന കിണറുകളില്‍ പരിശോധന നടത്തി. വ്യാഴാഴ്ച വന്‍ അഗ്‌നിനാളമായി കത്തിയ പരിയാപുരം സേക്രട്ട് ഹാര്‍ട്ട് കോണ്‍വെന്റിന്റെ കിണറ്റില്‍ ഒറ്റ ദിവസം കൊണ്ട് വീണ്ടും ഡീസല്‍ കലര്‍ന്ന വെള്ളം ഊറി. വ്യാഴാഴ്ച കത്തിച്ചപ്പോഴത്തെ അത്ര ഡീസല്‍ സാന്നിധ്യം വെള്ളിയാഴ്ച ഇല്ലെന്നാണ് പ്രാഥമിക പരിശോധനയില്‍ കണ്ടത്.
ഇതിന് സമീപം കല്ലറേട്ട് മറ്റത്തില്‍ ബിജു ജോസഫിന്റെ വീട്ടുവളപ്പിലെ കിണറ്റിലും ഡീസല്‍ സാന്നിധ്യം വര്‍ധിച്ച തോതില്‍ കണ്ടു. ഇവിടെ വ്യാഴാഴ്ച കിണര്‍ വെള്ളത്തില്‍നിന്ന് ഡീസല്‍ പാട നീക്കിയിരുന്നു. ഒറ്റ ദിവസം കൊണ്ട് വ്യാഴാഴ്ചത്തേക്കാള്‍ കൂടിയ തോതിലാണ് ഇന്ധന സാന്നിധ്യം കണ്ടത്. കോണ്‍വെന്റിന്റെ കിണറ്റില്‍ തിങ്കളാഴ്ച ഒരു തവണ കൂടി തീയിട്ട് ഇന്ധനം നീക്കും.