തിരുവനന്തപുരം: ഡി.ജി.പി ജേക്കബ് തോമസിനെ സര്‍വീസില്‍ നിന്ന് വീണ്ടും സസ്‌പെന്‍ഡ് ചെയ്തു. സര്‍ക്കാര്‍ അനുമതിയില്ലാതെ പുസ്തകമെഴുതിയതിനാണ് സസ്‌പെന്‍ഷന്‍. ‘സ്രാവുകള്‍ക്കൊപ്പം നീന്തുമ്പോള്‍’ എന്ന പുസ്തകത്തിലെ വെളിപ്പെടുത്തലുകള്‍ അഖിലേന്ത്യാ സര്‍വീസ് ചട്ടലംഘനമാണ് എന്ന് ചൂണ്ടിക്കാണിച്ചാണ് സസ്‌പെന്‍ഷന്‍.
പുസ്തകത്തില്‍ പാറ്റൂര്‍, ബാര്‍കോഴ, ബന്ധുനിയമനം തുടങ്ങിയ കേസുകള്‍ സംബന്ധിച്ച പരാമര്‍ശങ്ങള്‍ ചട്ടലംഘനമാണെന്ന് ആഭ്യന്തര അഡീഷനല്‍ ചീഫ് സെക്രട്ടറിയുടെ നേതൃത്വത്തിലുള്ള അന്വേഷണ സമിതി നേരത്തെ കണ്ടെത്തിയിരുന്നു. ഈ റിപ്പോര്‍ട്ടിന്റെ അടിസ്ഥാനത്തില്‍ സര്‍ക്കാര്‍ നിര്‍ദേശപ്രകാരമാണ് നടപടി.
കഴിഞ്ഞ അഴിമതിവിരുദ്ധ ദിനത്തില്‍ ഒരു പരിപാടിയില്‍ സര്‍ക്കാര്‍ വിരുദ്ധ പ്രസംഗം നടത്തിയതിന് ജേക്കബ് തോമസിനെ സസ്‌പെന്‍ഡ് ചെയ്തിരുന്നു. സംസ്ഥാനത്ത് അഴിമതിക്കെതിരെ മിണ്ടാന്‍ പേടിയാണ്, ഓഖി ദുരന്തം നേരിടുന്നതില്‍ സര്‍ക്കാര്‍ സംവിധാനം പരാജയപ്പെട്ടു തുടങ്ങിയ പരാമര്‍ശങ്ങളുടെ പേരിലായിരുന്നു സസ്‌പെന്‍ഷന്‍.