പി വി അന്‍വറിന്റെ പുതിയ പാര്‍ട്ടിയുടെ ഔദ്യോഗിക പ്രഖ്യാപനം ഇന്ന് മഞ്ചേരിയില്‍ നടക്കും. മഞ്ചേരിയില്‍ സംഘടിപ്പിക്കുന്ന രാഷ്ട്രീയ വിശദീകരണ സമ്മേളനത്തിലാണ് പാര്‍ട്ടിയുടെ പ്രഖ്യാപനം. പുതിയ പാര്‍ട്ടിയുടെ പേര് ഡെമോക്രാറ്റിക് മൂവ്‌മെന്റ് ഓഫ് കേരള എന്നാണ് പുറത്ത് വരുന്ന വിവരം. തമിഴ്‌നാട്ടിലെ ഡിഎംകെയുടെ സഖ്യകക്ഷിയായിട്ടാണ് പാര്‍ട്ടി കേരളത്തില്‍ പ്രവര്‍ത്തിക്കുക.
ഡിഎംകെ നേതാവ് എംകെ സ്റ്റാലിനുമായി പി വി അന്‍വര്‍ ഇന്നലെ കൂടിക്കാഴ്ച്ച നടത്തിയിരുന്നു. പി വി അന്‍വറിന്റെ പാര്‍ട്ടിയുടെ സമ്മേളന വേദിയില്‍ ഡിഎംകെയുടെ നിരീക്ഷകര്‍ ഉണ്ടായേക്കും. കഴിഞ്ഞ ദിവസമാണ് അന്‍വര്‍ പാര്‍ട്ടി പ്രഖ്യാപനം നടത്തിയത്. വരുന്ന പഞ്ചായത്ത് തിരഞ്ഞെടുപ്പില്‍ കേരളമുടനീളം മത്സരിക്കുമെന്നാണ് പിവി അന്‍വറിന്റെ പ്രഖ്യാപനം.
കഴിഞ്ഞ കുറച്ചു ദിവസങ്ങളിലായി പിവി അന്‍വര്‍ ആരോപണങ്ങളുമായി മുന്നോട്ട വന്നിരുന്നു. മലപ്പുറത്തെ മുന്‍ എസ്പി പി സുജിത്ത് ദാസിന് നേരെയുയര്‍ത്തിയ മരം മുറി ആരോപണം മുതല്‍ തുടങ്ങിയ പിവി അന്‍വര്‍ ഏറെ വെളിപ്പെടുത്തലുകളുമായി മുന്നോട്ട് വരുകയായിരുന്നു. മാമി തിരോധാനത്തിലേക്കും, മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി ശശിയിലേക്കും, എഡിജിപിയിലേക്കും നീണ്ട ആരോപണങ്ങള്‍ വലിയ വിവാദങ്ങളിലേക്കും ചര്‍ച്ചകളിലേക്കും വഴിവെച്ചിരുന്നു.
മുഖ്യമന്ത്രി പിണറായി വിജയനെതിരെയും അന്‍വര്‍ രംഗത്തെത്തിയതോടെ സിപിഐഎമ്മും അന്‍വറിനെതിരെ തിരിഞ്ഞിരുന്നു. ഭരണപക്ഷത്തിന്റെ ഭാഗമായിരിക്കില്ലെന്ന് പ്രഖ്യാപിച്ചു അന്‍വര്‍ പാര്‍ട്ടി പ്രഖ്യാപനവും നടത്തിയിരുന്നു.