ന്യൂഡല്‍ഹി: സുപ്രിംകോടതിക്ക് മുന്നില്‍ തീ കൊളുത്തി ആത്മഹത്യക്ക് ശ്രമിച്ച യുവാവ് മരിച്ചു. ഡല്‍ഹി റാം മനോഹര്‍ ലോഹ്യ ആശുപത്രിയില്‍ ചികിത്സയില്‍ ഇരിക്കെയാണ് മരിച്ചത്. യുവാവിനൊപ്പം ഉണ്ടായിരുന്ന യുവതി ചികിത്സയില്‍ തുടരുകയാണ്.
ഓഗസ്റ്റ് 16ന് സുപ്രീംകോടതിയുടെ ഡി ഗേറ്റിനു മുന്നില്‍ , യുവതിയും യുവാവും ദേഹത്ത് മണ്ണെണ്ണയൊഴിച്ച് തീകൊളുത്തി ആത്മഹത്യക്ക് ശ്രമിക്കുകയായിരുന്നു. യുപി ഗാസിപൂര്‍ സ്വദേശിയായ യുവതിയെ പീഡിപ്പിച്ചെന്ന പരാതിയില്‍ ബിഎസ്പി എംപി അതുല്‍ റായിയെ പൊലീസ് അറസ്റ്റു ചെയ്തിരുന്നു.
ഇതിന് പിന്നാലെ അതുല്‍ റായിയുടെ സഹോദരന്‍ നല്‍കിയ വ്യാജ രേഖ കേസില്‍ യുവതിക്കും യുവാവിനും എതിരെ ജാമ്യമില്ല വാറണ്ട് പുറപ്പെടുവിച്ചു. ഇതിനെ തുടര്‍ന്ന് ആത്മഹത്യ ചെയ്യുകയാണെന് ഫേസ് ബുക്ക് ലൈവില്‍ ഇരുവരും വ്യക്തമാക്കിയിരുന്നു.