80 ലക്ഷം രൂപ ലോട്ടറിയടിച്ചയാള്‍ ദുരൂഹ സാഹചര്യത്തില്‍ മരിച്ച സംഭവത്തില്‍ കൂട്ടുകാരനെ പൊലീസ് കസ്റ്റഡിയിലെടുത്തു. ലോട്ടറിയടിച്ച പാങ്ങോട് മതിര തൂറ്റിക്കല്‍ സജി വിലാസത്തില്‍ സജീവ് (35) മരിച്ച സംഭവത്തിലാണ് പാങ്ങോട് സ്വദേശി സന്തോഷിനെയാണ് പൊലീസ് കസ്റ്റഡിയിലെടുത്തത്. സമ്മാനത്തുക കിട്ടിയതിന് പിന്നാലെ നടത്തിയ മദ്യസല്‍ക്കാരത്തിനിടെ വീണ് പരിക്കേറ്റ സജീവ് ഇന്നലെയാണ് മരിച്ചത്.
കേരള സംസ്ഥാന ഭാഗ്യക്കുറിയുടെ 80 ലക്ഷം രൂപയാണ് സജീവന് ലോട്ടറിയടിച്ചത്. തുക കഴിഞ്ഞ ദിവസം സജീവന് ലഭിച്ചിരുന്നു. പിന്നാലെ ശനിയാഴ്ച രാത്രി ഒമ്പതിന് സുഹൃത്തായ രാജേന്ദ്രന്‍പിള്ളയുടെ വീട്ടില്‍ ഇവര്‍ ഒരുമിച്ച് കൂടി സല്‍ക്കാരം നടത്തുകയായിരുന്നു. ഇവിടെ സുഹൃത്തുക്കളുമായി സംസാരിച്ച് നില്‍ക്കുന്നതിനിടെ സജീവന് കെട്ടിടത്തിന് മുകളില്‍ നിന്ന് താഴേക്ക് വീഴുകയായിരുന്നു. തുടര്‍ന്ന് ഇയാളെ മെഡിക്കല്‍ കോളേജിലേക്ക് മാറ്റിയെങ്കിലും ജീവന്‍ രക്ഷിക്കാനായില്ല.
മദ്യസല്‍ക്കാരത്തിനിടെ സുഹൃത്തായ സന്തോഷ് സജീവനെ പിടിച്ചുതള്ളിയെന്ന് ബന്ധുവിന്റെ പരാതിയെ തുടര്‍ന്നാണ് പൊലീസ് ഇടപ്പെട്ടത്. തുടര്‍ന്ന് സന്തോഷിനെ കസ്റ്റഡിയില്‍ എടുക്കുകയായിരുന്നു. മരണകാരണം ഇപ്പോഴും വ്യക്തത വന്നിട്ടില്ല. പോസ്റ്റുമോര്‍ട്ടം റിപ്പോര്‍ട്ട് വന്നാലെ ഇക്കാര്യത്തില്‍ വ്യക്തത വരൂ.