കഴിഞ്ഞ ആഴ്ച തബൂക്കില്‍ വെച്ച് മരിച്ച ഭാര്യ പിതാവിന്റെ മരണമറിഞ്ഞു നാട്ടില്‍ നിന്നും കുടുംബസമേതം മദീനയിലെത്തിയ വയനാട് സ്വദേശി മക്കയില്‍ മരിച്ചു. സുല്‍ത്താന്‍ ബത്തേരി കല്ലുവയല്‍ സ്വദേശി അഷ്‌റഫ്(58) ആണ് ഹൃദയാഘാതത്തെത്തുടര്‍ന്ന് മക്കയില്‍ മരിച്ചത്.
ഇദ്ദേഹത്തിന്റെ ഭാര്യ പിതാവും തബൂക്കില്‍ ബിസിനസ് നടത്തിയിരുന്ന യൂസുഫ് ഹാജി എന്നയാള്‍ കഴിഞ്ഞ ആഴ്ചയാണ് മരിച്ചത്. മദീനയില്‍ ഖബറക്കം നടത്തിയ അദ്ദേഹത്തിന്റെ ഖബര്‍ സന്ദര്‍ശിക്കാനും ഉംറ നിര്‍വഹിക്കാനുമായി ഭാര്യക്കും മക്കള്‍ക്കുമൊപ്പം മദീനയില്‍ എത്തിയതായിരുന്നു മരിച്ച അഷ്‌റഫ്. മദീനയില്‍ നിന്നും മൂന്ന് ദിവസങ്ങള്‍ക്ക് മുമ്പാണ് ഇവര്‍ മക്കയിലെത്തി ഉംറ നിര്‍വഹിച്ചത്. ഇതിനിടെ താമസ സ്ഥലത്ത് വെച്ച് ഹൃദയാഘാതം സംഭവിക്കുകയും ഉടന്‍ അല്‍നൂര്‍ ആശുപത്രിയില്‍ എത്തിച്ചെങ്കിലും മരിക്കുകയായിരുന്നു.
നാട്ടില്‍ ബിസിനാസുകാരനായ അഷ്‌റഫ് സുല്‍ത്താന്‍ ബത്തേരി ടിപി ഏജന്‍സി ഉടമകൂടിയാണ്. ഭാര്യ സാജിത. മക്കള്‍: ഇലാന്‍, ഹിബ, ഹന്ന. പിതാവ്: മമ്മദ്. മാതാവ് മറിയം.