സൗദി കിഴക്കൻ പ്രവിശ്യയിലെ അറിയപ്പെടുന്ന സാമൂഹിക പ്രവർത്തകനും സാംസ്‌കാരിക രംഗത്തെ സജീവ സാന്നിധ്യവുമായിരുന്ന തിരുവനന്തപുരം മാറ്റാപ്പള്ളി മുഹമ്മദ് നജാം (63) അൽ ഖോബാറിൽ നിര്യാതനായി. വാഹനാപകടത്തിൽ പരിക്കേറ്റ് അൽ ഖോബാറിലെ സ്വകാര്യ ആശുപത്രിയിൽ ചികിത്സയിലിരിക്കെ ഇന്ന് രാവിലെയായിരുന്നു അന്ത്യം.
ഒരാഴ്ച മുമ്പാണ് ഇദ്ദേഹം ഓടിച്ചിരുന്ന വാഹനം അപകടത്തിൽ പെട്ടത്.അതീവ ഗുരുതരാവസ്ഥയിലായിരുന്ന നജാമിന് വിദഗ്ധ ചികിത്സ ലഭ്യമാക്കിയിരുന്നുവെങ്കിലും മരുന്നുകളോട് പ്രതികരിച്ചിരുന്നില്ല.മുൻ ഡി.ജി.പി ഒ.എം ഖാദറിന്റെ മകനായ നജാം മൂന്നര പതിറ്റാണ്ടായി ദമ്മാമിലെ പ്രമുഖ കമ്പനിയിൽ മാനേജറായി ജോലി ചെയ്തു വരികയായിരുന്നു.കിഴക്കൻ പ്രവിശ്യയിലെ സാമൂഹിക, സാംസ്‌കാരിക, കലാ രംഗത്ത് സജീവമായിരുന്ന ഇദ്ദേഹം പ്രവാസ ലോകത്ത് വിശാലമായ സൗഹൃദം സൂക്ഷിച്ചിരുന്നു. സിനിമാ പ്രവർത്തകയും കൊറിയോഗ്രാഫരുമായ സജ്‌ന നജാം ആണ് ഭാര്യ. മക്കൾ: നീമ നജാം, റിയ നജാം.