ചൂട് കൂടിയ സാഹചര്യത്തിലാണ് വൈദ്യുതി ഉപയോഗവും ക്രമാതീതമായി വര്‍ധിച്ചത്. കെഎസ്‌ഇബിയുടെ ചരിത്രത്തിലാദ്യമായി ഒറ്റ ദിവസം (വ്യാഴാഴ്ച) 100.3028 ദശലക്ഷം യൂണിറ്റ് വൈദ്യുതിയാണ് ഉപയോഗിച്ചത്. 2022 ഏപ്രില്‍ 28ന് രേഖപ്പെടുത്തിയ 92.88 ദശലക്ഷം യൂണിറ്റ് എന്ന റെക്കോര്‍ഡാണ് ഇപ്പോള്‍ മറികടന്നത്. ഇതോടൊപ്പം വൈദ്യുതി ആവശ്യകത 4903 മെഗാവാട്ട് ആയി ഉയര്‍ന്നു. ഇതും സര്‍വകാല റെക്കോര്‍ഡാണ്.
ഇടുക്കിയില്‍ ആകെ 37 ശതമാനം ജലമാണുള്ളത്. ആകെ സംഭരണികളില്‍ ശേഷിക്കുന്നത് 41 ശതമാനം ജലമാണ്. നീരൊഴുക്കും കഴിഞ്ഞ വര്‍ഷത്തിന്‍റെ പകുതിയായിട്ടുണ്ട്. കഴിഞ്ഞ 6 വര്‍ഷത്തെ ഏറ്റവും കുറഞ്ഞ ജലനിരപ്പാണിത്. വൈദ്യുതി ഉപയോഗം ഇത്തരത്തില്‍ ക്രമാതീതമായി ഉയര്‍ന്നാല്‍ പ്രതിസന്ധി രൂക്ഷമാകാം. അങ്ങനെയെങ്കില്‍ വൈദ്യുതി നിയന്ത്രണം വരാനും സാധ്യതയുണ്ട്.