തിരൂര്‍ റോഡിലെ മഞ്ചാടിയില്‍ സ്‌ക്കൂട്ടറില്‍ കാറിടിച്ച് യാത്രികന് മരിച്ചു. ഒപ്പമുണ്ടായിരുന്ന ഭാര്യയ്ക്ക് ഗുരുതരമായി പരിക്കേറ്റു. കഴിഞ്ഞദിവസം വൈകുന്നേരത്തോടെയാണ് സംഭവം.
അപകടത്തില്‍ പുത്തനത്താണി കരിങ്കപ്പാറ കുന്നോതൊടത് അബ്ദുല്‍ഖാദര്‍ (48) ആണ് മരിച്ചത്.ഒരു പരിപാടിയില്‍ പങ്കെടുത്ത ശേഷം വീട്ടിലേക്കു മടങ്ങവേ എതിരെവന്ന ഇന്നോവ മറ്റൊരു വാഹനത്തെ മറികടക്കാന്‍ ശ്രമിക്കുന്നതിനിടെ സ്‌കൂട്ടറില്‍ ഇടിക്കുകയായിരുന്നു. സംഭവത്തിന്റെ സിസിടിവി ദൃശ്യങ്ങള്‍ പുറത്ത് വന്നിട്ടുണ്ട്. നടുക്കുന്ന ദൃശ്യങ്ങളില്‍ മുന്‍ സീറ്റിലിരുന്ന അബ്ദുല്‍ ഖാദറും ഭാര്യയും തെറിച്ചു വീഴുന്നത് കാണാന്‍ കഴിയും. കാര്‍ ഡ്രൈവറുടെ അശ്രദ്ധയാണ് അപകടത്തിന് കാരണമെന്നാണ് ദൃക്‌സാക്ഷികള്‍ പറയുന്നത്.