കാറില്‍ 54 ലിറ്റര്‍ അനധികൃത മദ്യവുമായി സി.പി.എം ലോക്കല്‍ കമ്മിറ്റി അംഗത്തെ എക്‌സൈസ് പിടികൂടി. വടവന്നൂര്‍ കുണ്ടുകാട് ചാളയ്ക്കല്‍ എ. സന്തോഷിനെയാണ് (54) പിടികൂടിയത്. വടവന്നൂര്‍ ലോക്കല്‍ കമ്മിറ്റി അംഗവും കുണ്ടുകാട് ബ്രാഞ്ച് സെക്രട്ടറിയുമായ സന്തോഷ് 2020-ലെ തദ്ദേശ തിരഞ്ഞെടുപ്പില്‍ ഗ്രാമപ്പഞ്ചായത്ത് സ്ഥാനാര്‍ഥിയായിരുന്നു.

തിങ്കളാഴ്ച വൈകീട്ട് 5.15-ന് കൊല്ലങ്കോട്-പുതുനഗരം പാതയില്‍ പുതുനഗരം ഗ്രാമപ്പഞ്ചായത്തോഫീസിന് മുന്‍പില്‍വെച്ചാണ് മദ്യം പിടികൂടിയത്. അരലിറ്റര്‍ വീതമുള്ള 108 കുപ്പികള്‍ ആറ് കെയ്‌സുകളിലാക്കി കാറിന്റെ പിന്നില്‍വെച്ച് കടത്തുകയായിരുന്നു. പാലക്കാട്ടുനിന്ന് കുറഞ്ഞ വിലയ്ക്ക് വാങ്ങി കൊല്ലങ്കോട് ഭാഗത്ത് കൂടുതല്‍വിലയ്ക്ക് വില്‍ക്കാനാണ് മദ്യം കടത്തിയത്.

ഹോളോഗ്രാമോ സീലോ ഇല്ലാത്തതിനാല്‍ സര്‍ക്കാര്‍ മദ്യക്കടകളില്‍നിന്ന് വാങ്ങിയതല്ലെന്ന് പ്രഥമദൃഷ്ട്യാ വ്യക്തമാണെന്നും എവിടെയോ വ്യാജമായി നിര്‍മിച്ചതാണെന്നും കൂടുതല്‍ അന്വേഷണം ആവശ്യമുണ്ടെന്നും എക്‌സൈസ് അധികൃതര്‍ പറഞ്ഞു.

രഹസ്യവിവരത്തെത്തുടര്‍ന്ന് കൊല്ലങ്കോട് എക്‌സൈസ് അസി. ഇന്‍സ്‌പെക്ടര്‍ എന്‍. സന്തോഷ്, പ്രിവന്റീവ് ഓഫീസര്‍മാരായ പി. ചെന്താമര, കെ. രമേഷ്, യു. നാസര്‍, സീനിയര്‍ സിവില്‍ എക്‌സൈസ് ഓഫീസര്‍ എ. അരവിന്ദാക്ഷന്‍ തുടങ്ങിയവരാണ് പരിശോധന നടത്തിയത്. തിങ്കളാഴ്ചരാത്രി പ്രതിയുടെ വൈദ്യപരിശോധന പൂര്‍ത്തിയാക്കി. ചൊവ്വാഴ്ച രാവിലെ മജിസ്‌ട്രേറ്റിന് മുന്‍പില്‍ ഹാജരാക്കും.