ന്യൂഡല്‍ഹി: കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയില്‍ പങ്കെടുക്കാന്‍ സിപിഎം കേന്ദ്ര കമ്മിറ്റി. കേന്ദ്രക്കമ്മിറ്റി അംഗം മുഹമ്മദ് യൂസഫ് തരിഗാമിയാണ് ഭാരത് ജോഡോ യാത്രയില്‍ പങ്കെടുക്കുന്നത്. എന്നാല്‍ കേന്ദ്ര കമ്മിറ്റിയുടെ നീക്കത്തിനെ വിമര്‍ശനവുമായി കേരള ഘടകം മുന്നോട്ട് വന്നു. ഭാരത് ജോഡോ യാത്ര കന്യാകുമാരിയില്‍ നിന്ന് ആരംഭിച്ച് കേരളത്തില്‍ എത്തിയതു മുതല്‍ യാത്രയെ ഇകഴ്ത്തി കാണിക്കുന്നതില്‍ കേരള ഘടകം മുന്നിലാണ്.
മുഹമ്മദ് യൂസഫ് തരിഗാമിക്ക് പുറമെ, കശ്മീര്‍ മുന്‍ മുഖ്യമന്ത്രിമാരും നാഷണല്‍ കോണ്‍ഫറന്‍സ് നേതാക്കളുമായ ഫറൂഖ് അബ്ദുള്ള, ഒമര്‍ അബ്ദുള്ള, പിഡിപി നേതാവ് മെഹബൂബ മുഫ്തി തുടങ്ങിയവരും ഭാരത് ജോഡോ യാത്രയില്‍ പങ്കെടുക്കുമെന്ന് എഐസിസി ജനറല്‍ സെക്രട്ടറി കെ സി വേണുഗോപാല്‍ പറഞ്ഞു.
ഭാരത് ജോഡോ യാത്രയുടെ ജമ്മു കശ്മീരിലെ യാത്രയുടെ ഒരുക്കങ്ങള്‍ വിലയിരുത്താന്‍ ചേര്‍ന്ന യോഗത്തിന് ശേഷമാണ് കെ സി വേണുഗോപാല്‍ ഇക്കാര്യം അറിയിച്ചത്. ജനാധിപത്യമതനിരപേക്ഷ സ്വഭാവമുള്ള എല്ലാ പാര്‍ട്ടികളേയും യാത്രയിലേക്ക് ക്ഷണിക്കുകയാണ്. ഭാരത് ജോഡോ യാത്ര വന്‍ വിജയമാണെന്നും, യാത്രയെ ജനങ്ങള്‍ ഏറെ പ്രതീക്ഷയോടെയാണ് കാണുന്നതെന്നും കെ സി വേണുഗോപാല്‍ അറിയിച്ചു.