കോടതി മുറ്റത്ത് കാമുകന് സിപിഎം പ്രവര്‍ത്തകരുടെ മര്‍ദനം. വീട് വിട്ടിറങ്ങിയ വിദ്യാര്‍ഥിനി കാമുകനൊപ്പം ജീവിക്കാന്‍ തീരുമാനിച്ചതിനെ തുടര്‍ന്നാണ് ആക്രമണം നേരിട്ടത്. ഇടുക്കിയിലാണ് സംഭവം.
കോടതിയില്‍ കമിതാക്കളെ ഹാജരാക്കി പുറത്തിറങ്ങിയപ്പോഴാണ് യുവാവിനെതിരെ ആക്രമണമുണ്ടായത്.
കോടതിയുടെ മുന്നിലിട്ട് കാമുകനെ മര്‍ദ്ദിക്കുകയും പെണ്‍കുട്ടിയെ തിരിച്ച് വീട്ടിലേക്കു കൊണ്ടുപോകാനും ശ്രമിച്ച സിപിഎം പ്രവര്‍ത്തകര്‍ക്ക് എതിരെ പൊലീസ് കേസെടുത്തു. സംഘര്‍ഷത്തിന് നേതൃത്വം നല്‍കിയ സിപിഎം ജില്ലാ നേതാക്കളടക്കമുള്ള 14 പേര്‍ക്കെതിരേയാണ് ഇടുക്കി മുട്ടം പോലീസ് സ്വമേധയാ കേസെടുത്തത്.
സിപിഎമ്മിന്റെ ഏരിയാ സെക്രട്ടറിമാരായ ടിആര്‍ സോമന്‍, മുഹമ്മദ് ഫൈസല്‍ എന്നിവര്‍ ഉള്‍പ്പെടെ 11 സിപിഎം. പ്രവര്‍ത്തകര്‍ക്കെതിരെയും പെണ്‍കുട്ടിയുടെ കാമുകനും രണ്ട് ബന്ധുക്കള്‍ക്കുമെതിരെയാണ് കേസെടുത്തിരിക്കുന്നത്. സിപിഎം പ്രവര്‍ത്തകരുടെ ആക്രമണത്തില്‍ യുവാവിന് പരിക്കേറ്റു.
പുറപ്പുഴ ശാന്തിഗിരി കോേളജിലെ ബിരുദവിദ്യാര്‍ഥിനിയും മലപ്പുറം സ്വദേശിയും കെ.എസ്.എഫ്.ഇ. ജീവനക്കാരനുമായ യുവാവും സോഷ്യല്‍ മീഡിയയിലൂടെ പരിചയപ്പെട്ട് പ്രണയത്തിലാകുകയായിരുന്നു. കഴിഞ്ഞ ആഴ്ചയാണ് പെണകുട്ടി കാമുകനൊപ്പം പോയത്. നാലാം തീയതി യുവതിയെ കാണാനില്ലെന്നു ചൂണ്ടിക്കാട്ടി സിപിഎം പ്രവര്‍ത്തകനും മണിയാറന്‍കുടി സ്വദേശിയുമായ പിതാവ് കരിങ്കുന്നം സ്‌റ്റേഷനില്‍ പരാതി നല്‍കിയിരുന്നു.