കോവിഡ് മഹാമാരിയെ തുടര്‍ന്നുള്ള ആശങ്ക സര്‍വവ്യാപകമായിരിക്കുന്നതിനിടെ കൊറോണ വൈറസിനെക്കുറിച്ചുള്ള കൂടുതല്‍ വിവരങ്ങള്‍ ഐഐടി മദ്രാസിലെ ഗവേഷകരുട പഠനത്തില്‍ വെളിപ്പെടുത്തുന്നുണ്ട്. ജലദോഷം പരത്തുന്ന കൊറോണ വൈറസ് താരതമ്യേന ചെറിയ പ്രശ്നങ്ങള്‍ സൃഷ്ടിക്കുമ്പോള്‍ കോവിഡിന് കാരണമാകുന്ന സാര്‍സ് കോവ് 2വും സാര്‍സ് കോവ് വൈറസും എങ്ങനെ അപകടകാരികളാവുന്നുവെന്നാണ് ഇവര്‍ അന്വേഷിച്ചത്. പഠനത്തിലെ വിവരങ്ങള്‍ ഭാവിയില്‍ കോവിഡിനെതിരായ ചികിത്സയില്‍ ഗുണം ചെയ്യുമെന്നും കരുതപ്പെടുന്നു.
2002ല്‍ ചൈനയില്‍ തിരിച്ചറിഞ്ഞ സാര്‍സ് കോവ് വൈറസിനും സാധാരണ ജലദോഷത്തിന് കാരണമാകുന്ന വൈറസുകളില്‍ ഒന്നായ എന്‍എല്‍ 63നും ഒപ്പം സാര്‍സ് കോവ് 2 വൈറസിനേയുമാണ് താരതമ്യ പഠനത്തിന് വിധേയമാക്കിയത്.
കൊറോണ വൈറസിന്റെ മനുഷ്യശരീരത്തിലേക്കുള്ള പ്രവേശന കവാടങ്ങളായാണ് എസിഇ2 കളെ കരുതുന്നത്. മനുഷ്യശരീരത്തിലെ ശ്വാസകോശം, ഹൃദയം, രക്തക്കുഴലുകള്‍, കിഡ്നി, കരള്‍ തുടങ്ങി നിരവധി ഭാഗങ്ങളില്‍ എസിഇ2 പ്രോട്ടീനുകളെ കണ്ടെത്താനാവും. കൊറോണ വൈറസിന്റെ സ്പൈക് പ്രോട്ടീനുകള്‍ ഈ എസിഇ2 വിലാണ് ആദ്യം പറ്റിപ്പിടിക്കുന്നതും പിന്നീട് ഇരട്ടിച്ച് പടര്‍ന്നുപിടിക്കുന്നതും. ഏതെല്ലാം ഭാഗങ്ങളില്‍ എസിഇ2വിന്റെ സാന്നിധ്യമുണ്ടോ അവിടെയെല്ലാം സാര്‍സ് കോവ് 2 വൈറസിന് എത്തിപ്പെടാനും വ്യാപിക്കാനും എളുപ്പമാണ്.
മനുഷ്യരിലെ എസിഇ 2 റിസപ്ടറുകളുമായി എളുപ്പത്തില്‍ ബന്ധം സ്ഥാപിക്കാന്‍ സാധിക്കുന്ന സ്പൈക് പ്രോട്ടീനുകളുള്ള വൈറസുകളാണ് കൂടുതല്‍ അപകടകാരികളാകുന്നതെന്ന് ഈ പഠനത്തിലൂടെ തിരിച്ചറിഞ്ഞു. ജനിതക പരിണാമം സംഭവിച്ച പല സാര്‍സ് കോവ് 2 വൈറസുകള്‍ക്ക് മനുഷ്യരിലെ എസിഇ 2 റിസപ്ടറുകളുമായി ചേരാനുള്ള ശേഷി കൂടുതലാണെന്നും പഠനത്തിന് നേതൃത്വം നല്‍കിയ ഡോ. മിഷേല്‍ ഗ്രോമിഹ പറയുന്നു.