ജയ്പൂര്‍: രാജസ്ഥാനില്‍ അഞ്ചുമാസം പ്രായമുള്ള കുഞ്ഞിനെ കനാലിലേക്ക് വലിച്ചെറിഞ്ഞ് കൊന്ന് ദമ്പതികള്‍. ബിക്കാനീര്‍ ജില്ലയിലാണ് സംഭവം. മൂന്ന് കുട്ടികള്‍ ആകുമ്പോള്‍ ജോലി നഷ്ടപ്പെടുമെന്ന ഭയമാണ് ക്രൂരകൃത്യത്തിന് പ്രേരിപ്പിച്ചതെന്ന് പൊലീസ്. ഇവരെ അറസ്റ്റ് ചെയ്തതായി പൊലീസ് അറിയിച്ചു.
രാജസ്ഥാന്‍ സര്‍ക്കാരില്‍ കരാര്‍ ജീവനക്കാരനായ ജവര്‍ലാല്‍ മേഘ്‌വാള്‍ ആണ് ക്രൂരകൃത്യം ചെയ്തത്. ഭാര്യയും ക്രൂരകൃത്യത്തിന് കൂട്ടുനിന്നു. ഇരുവരും ഒരുമിച്ചാണ് പെണ്‍കുഞ്ഞിനെ കനാലിലേക്ക് വലിച്ചെറിഞ്ഞ് കൊന്നത്.
രണ്ടു കുട്ടികള്‍ നയമാണ് രാജസ്ഥാനില്‍ നിലനില്‍ക്കുന്നത്. സര്‍ക്കാര്‍ സര്‍വീസില്‍ സ്ഥിരമാകുമെന്ന പ്രതീക്ഷയിലായിരുന്നു ഇയാള്‍. അതിനിടെയാണ് മൂന്നാമത്തെ കുട്ടിയുടെ ജനനം. രാജസ്ഥാനിലെ രണ്ട് കുട്ടികള്‍ നയം അനുസരിച്ച് മൂന്നാമതൊരു കുട്ടി ജനിച്ചാല്‍ നിര്‍ബന്ധമായി വിരമിക്കണമെന്നുണ്ട്.
തനിക്ക് മൂന്ന് കുട്ടികള്‍ ഉണ്ടെന്ന് അറിഞ്ഞാല്‍ ജോലി നഷ്ടപ്പെടുമോ എന്ന ഭയമാണ് 36കാരനെ കൊണ്ട് ക്രൂരകൃത്യത്തിന് പ്രേരിപ്പിച്ചതെന്ന് പൊലീസ് പറയുന്നു. കൊലപാതകം ഉള്‍പ്പെടെ വിവിധ വകുപ്പുകള്‍ ചുമത്തിയാണ് ദമ്പതികളെ അറസ്റ്റ് ചെയ്തതെന്നും പൊലീസ് അറിയിച്ചു.