റിയോ ഡി ജനെയ്‌റോ: കോപ്പ അമേരിക്ക ഫുട്‌ബോളില്‍ അര്‍ജന്റീനയ്‌ക്കെതിരായ ഫൈനലിന് ഒരുങ്ങുന്ന ബ്രസീല്‍ ടീമിന് കനത്ത തിരിച്ചടി. ചിലിക്കെതിരായ ക്വാര്‍ട്ടര്‍ ഫൈനലില്‍ ചുവപ്പ് കാര്‍ഡ് കണ്ട് പുറത്തുപോയ ഗബ്രിയേല്‍ ജെസ്യൂസിന് ഫൈനല്‍ കളിക്കാനാവില്ല.
ചിലിക്കെതിരായ മത്സരത്തിന്റെ 48ാം മിനിറ്റില്‍ മെനയെ അപകടകരമായ രീതിയില്‍ കുങ്ഫു ചലഞ്ച് ചെയ്ത ജെസ്യൂസിനെ രണ്ട് മത്സരങ്ങളില്‍ നിന്ന് കോണ്‍മെബോള്‍ സസ്‌പെന്റ് ചെയ്തു. സസ്‌പെന്‍ഷനൊപ്പം 5000 ഡോളര്‍ പിഴയും ചുമത്തിയിട്ടുണ്ട്. പാക്വേറ്റയിലൂടെ ബ്രസീല്‍ ലീഡെടുത്ത് രണ്ട് മിനിറ്റ് മാത്രം പിന്നിട്ടപ്പോഴാണ് ജെസ്യൂസ് പുറത്തുപോയത്. 10 പേരായി ചുരുങ്ങിയിട്ടും ഒരു ഗോളില്‍ പ്രതിരോധിച്ച് നിന്ന് ബ്രസീല്‍ സെമിയിലെത്തുകയായിരുന്നു.
പെറുവിനെതിരായ സെമി ഫൈനലിലും ജെസ്യൂസ് പുറത്താണിരുന്നത്. പകരം എവര്‍ട്ടനാണ് ബ്രസീലിനായി കളിച്ചത്. മരക്കാനയില്‍ ഇന്ത്യന്‍ സമയം ഞായാറാഴ്ച്ച പുലര്‍ച്ചെ 5.30നാണ് ഫൈനല്‍.