കോഴിക്കോട്: മുക്കം മുത്തേരിയില്‍ വയോധികയെ പീഡിപ്പിച്ച ശേഷം കവര്‍ച്ച നടത്തിയ കേസിലെ പ്രതി ജയില്‍ചാടി. മലപ്പുറം കൊണ്ടോട്ടി നെടിയിരിപ്പ് കാവുങ്ങല്‍ നല്ലിമ്പത്ത് വീട്ടില്‍ മുജീബുറഹ്മാന്‍ (45) ആണ് ജയില്‍ ചാടിയത്. കോഴിക്കോട് ജില്ലാ ജയില്‍ കോവിഡ് സെന്ററില്‍ നിന്ന് ഇന്നലെ രാത്രി എട്ടോടെയാണ് ഇയാള്‍ പൊലീസിന്റെ കണ്ണുവെട്ടിച്ച് രക്ഷപ്പെട്ടത്. ജയില്‍ ചാടിയ പ്രതിക്കായി പൊലീസ് അന്വേഷണം ആരംഭിച്ചു.
ജൂലൈ രണ്ടിനാണ് കേസിനാസ്പദമായ സംഭവം നടന്നത്. ഓട്ടോ യാത്രക്കിടെ 65 വയസുകാരിയെ ബോധരഹിതയാക്കി ലൈംഗികമായി പീഡിപ്പിക്കുകയും കവര്‍ച്ച നടത്തുകയുമായിരുന്നു. ജൂലൈ 17ന് സാഹസികമായാണ് പൊലീസ് പ്രതിയെ പിടികൂടിയത്.
ഓമശ്ശേരിയിലെ ഹോട്ടലിലേക്ക് പോവാനാണ് വയോധികയായ സ്ത്രീ ഓട്ടോയില്‍ കയറിയത്. ഇവരെ ഓട്ടോയില്‍ വെച്ച് മര്‍ദിച്ച് അവശയാക്കി വായില്‍ തുണി തിരുകി തൊട്ടടുത്തുള്ള കാപ്പുമല റബ്ബര്‍ എസ്റ്റേറ്റിലെ വിജനമായ കുറ്റിക്കാട്ടിലെത്തിച്ച് കെട്ടിയിട്ട് പീഡിപ്പിക്കുകയും ബാഗ്, ആഭരണങ്ങള്‍, മൊബൈല്‍ ഫോണ്‍, പണം എന്നിവ കവര്‍ന്നെന്നുമാണ് കേസ്. വാഹനമോഷണം, പിടിച്ചുപറി എന്നീ കേസുകളില്‍ ശിക്ഷ അനുഭവിച്ചയാളാണ് മുജീബ് റഹ്മാന്‍.