ചെങ്ങന്നൂരിൽ അഭിഭാഷകനെ കുത്തിക്കൊലപ്പെടുത്താൻ ശ്രമിച്ച കേസിൽ മറ്റൊരു അഭിഭാഷകനെ പൊലീസ് കസ്റ്റഡിയിലെടുത്തു. അഡ്വ രാഹുൽ കുമാറിനെ കുത്തിക്കൊലപ്പെടുത്താൻ ശ്രമിച്ച കേസിൽ ഹിന്ദു ഐക്യവേദി ജില്ലാ സെക്രട്ടറി കൂടിയായ അഡ്വ അശോക് അമാനാണ് പോലീസ് കസ്റ്റഡിയിലുള്ളത്. ചെങ്ങന്നൂർ കോടതിയിലെ ജൂനിയർ അഭിഭാഷകനാണ് രാഹുൽ കുമാർ.
രാഹുലും അശോകും തമ്മിൽ വക്കാലത്തിനെ ചൊല്ലി വാക്കേറ്റമുണ്ടായിരുന്നു. ഇതിന് പിന്നാലെ അശോക് അമാൻ കൈയ്യിൽ കരുതിയിരുന്ന കത്തിയെടുത്ത് രാഹുൽ കുമാറിനെ കുത്തുകയായിരുന്നു. പരിക്കേറ്റ രാഹുലിനെ ആശുപത്രിയിൽ പ്രവേശിപ്പിച്ചു.
സംഭവത്തിൽ ഇതുവരെ കേസ് രജിസ്റ്റർ ചെയ്തിട്ടില്ല. ഇന്നലെ രാത്രിയാണ് സംഭവം നടന്നത്. രാഹുൽ കുമാർ മറ്റൊരു അഭിഭാഷക ഓഫീസിലെ ജീവനക്കാരനാണ്. ചെങ്ങന്നൂർ എംസി റോഡിലെ അശോക് അമാന്റെ വീടിന് മുന്നിൽ വെച്ചാണ് ഇന്നലെ രാത്രി സംഭവം നടന്നത്. വഴിവക്കിൽ വെച്ച് ഇരുവരും തമ്മിൽ കണ്ടുമുട്ടിയപ്പോൾ പല കാര്യങ്ങളും പറഞ്ഞ് തർക്കമുണ്ടായി.
ഏറ്റവും പ്രധാനപ്പെട്ട തർക്കം അശോക് അമാന്റെ വക്കാലത്ത് ഒഴിയുന്ന കേസുകൾ തട്ടിയെടുക്കുന്നു എന്നായിരുന്നു പരാതി. രാഹുലിന്റെ ഓഫീസിലെ സ്ത്രീകളോട് അശോക് അമാൻ മോശമായി പെരുമാറുന്നുവെന്ന എതിർ പരാതിയും ഉണ്ടായി. ഇതിനെ ചൊല്ലി രാഹുലും അശോക് അമാനും തമ്മിൽ തർക്കം കൈയ്യാങ്കളിയിലേക്ക് എത്തുകയായിരുന്നു. കുത്തേറ്റ രാഹുലിനെ ഇന്നലെ രാത്രി തന്നെ ആശുപത്രിയിൽ പ്രവേശിപ്പിച്ചു.