കള്ളുഷാപ്പിലെ തര്‍ക്കത്തെത്തുടര്‍ന്ന് യുവാവിനെ കുപ്പിച്ചില്ലുകൊണ്ട് ശരീരമാസകലം മുറിവുണ്ടാക്കി കൊലപ്പെടുത്താന്‍ ശ്രമിച്ചയാളെ പോലീസ് അറസ്റ്റുചെയ്തു. തിരൂരങ്ങാടി കുളപ്പുറം എ.ആര്‍. നഗര്‍ പാവുതൊടി സാജിത്താണ് (49) വധശ്രമത്തിന് അറസ്റ്റിലായത്.
വണ്ടൂര്‍ മധുരക്കരിയന്‍ മുജീബ് റഹിമാനാണ് (39) മുഖത്തും കഴുത്തിലും വയറ്റത്തും കാലിലുമെല്ലാം മുറിവേറ്റത്. ഇദ്ദേഹം തൃശ്ശൂര്‍ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. കഴിഞ്ഞ 11ന് ഷൊര്‍ണൂര്‍ റെയില്‍വേസ്‌റ്റേഷനടുത്തുള്ള കള്ളുഷാപ്പിനുസമീപമായിരുന്നു സംഭവം.
കള്ളുകുടിക്കാനെത്തിയ സാജിതും സുഹൃത്ത് മുജീബ് റഹിമാനുമായി തര്‍ക്കമുണ്ടായതായും പ്രകോപിതനായ സാജിത് ഷാപ്പിനുപുറത്തുവെച്ച് താഴെക്കിടന്ന കുപ്പിച്ചില്ലെടുത്ത് ആക്രമിക്കുകയുമായിരുന്നു. കോഴിക്കോട് ചോമ്പാലയില്‍നിന്നാണ് സാജിത്തിനെ അറസ്റ്റുചെയ്തത്. ഇയാള്‍ക്കെതിരേ തിരൂരങ്ങാടി പോലീസിലും കേസുണ്ട്. തീവണ്ടികയറി ഷൊര്‍ണൂരെത്തി തിരിച്ചുപോകുന്നവരാണിവരെന്നും പോലീസ് പറയുന്നു. സാജിത്തിനെ കോടതി റിമാന്‍ഡ് ചെയ്തു.