സര്‍ക്കാര്‍ പരിപാടിയില്‍ മുഖ്യാതിഥിയായി വിവാദ യൂട്യൂബര്‍ സഞ്ചു ടെക്കി. ആലപ്പുഴ ജില്ലാ പഞ്ചായത്ത് ആര്യാട് ഡിവിഷന്‍ സംഘടിപ്പിക്കുന്ന പരിപാടിയിലാണ് സഞ്ചു ടെക്കിയെ മുഖ്യാതിഥിയാക്കിയത്. കാറില്‍ സ്വിമ്മിങ് പൂള്‍ ഒരുക്കിയതിന് സഞ്ജു ടെക്കിയെ മോട്ടോര്‍ വാഹനവകുപ്പ് ശിക്ഷിച്ചിരുന്നു.
മണ്ണഞ്ചേരി ഗവ. ഹൈസ്‌കൂളിലെ കുട്ടികളുടെ മാഗസിന്‍ പ്രകാശനത്തിനാണ് മുഖ്യാതിഥിയായി സഞ്ജു എത്തുന്നത്. ആലപ്പുഴ ജില്ലാ പഞ്ചായത്ത് ആര്യാട് ഡിവിഷന്റെ കീഴിലാണ് പരിപാടി. ജില്ലാ പഞ്ചായത്ത് അംഗം ആര്‍. റിയാസ് ആണ് പരിപാടിയുടെ മുഖ്യ സംഘാടകന്‍.
കുട്ടികള്‍ക്ക് മാതൃകയാകേണ്ട പരിപാടിയില്‍ മോട്ടോര്‍ വാഹനവകുപ്പ് ശിക്ഷിച്ച ഒരാളെ പങ്കെടുപ്പിക്കുന്നതിനെ വലിയ പ്രതിഷേധം ഉയരുന്നുണ്ട്. എന്നാല്‍ പരിപാടിയുമായി മുന്നോട്ട് പോകുമെന്ന തീരുമാനത്തിലാണ് ജില്ലാ പഞ്ചായത്ത്. കാറില്‍ സ്വിമ്മിങ് പൂള്‍ ഒരുക്കിയത് വന്‍ വിവാദം സൃഷ്ടിച്ചിരുന്നു.