തിരുവനന്തപുരം: കടല്‍ഭിത്തി നിര്‍മാണത്തില്‍ സംസ്ഥാന സര്‍ക്കാരിന്റെ അടിയന്തര ശ്രദ്ധയുണ്ടാകണമെന്ന് ഇ.ടി.മുഹമ്മദ് ബഷീര്‍ എം.പി. മുഖ്യമന്ത്രി വിളിച്ചുചേര്‍ത്ത എം.പിമാരുടെ യോഗത്തില്‍ സംസാരിക്കുകയായിരുന്നു അദ്ദേഹം. കടല്‍ഭിത്തി നിര്‍മാണത്തിന്റെ ചുമതല സംസ്ഥാന സര്‍ക്കാറിന് കൈമാറിയതിനാല്‍ സംസ്ഥാന സര്‍ക്കാര്‍ ഗൗരവപരമായ സമീപനം ഇക്കാര്യത്തില്‍ സ്വീകരിക്കണം. പൊന്നാനി പാര്‍ലമെന്റ് മണ്ഡലത്തില്‍ ഉള്‍ക്കൊള്ളുന്ന തീരപ്രദേശങ്ങളത്രയും വലിയ തോതിലുള്ള കടലാക്രമണ ഭീഷണി നേരിട്ടുകൊണ്ടിരിക്കുകയാണ്.
ജനങ്ങളുടെ സുരക്ഷിതത്വവും അവരുടെ ജീവിതമാര്‍ഗവും മുടങ്ങുന്ന സാഹചര്യമാണ് നിലവുള്ളത്. ഇക്കാര്യത്തില്‍ സര്‍ക്കാര്‍ മുന്‍ഗണന നല്‍കണമെന്നും സര്‍ക്കാര്‍ ഉത്തരവാദിത്വം നിര്‍വ്വഹിക്കണമെന്നും ഇ.ടി ആവശ്യപ്പെട്ടു. തുടര്‍ന്ന് മറുപടി പറഞ്ഞ മുഖ്യമന്ത്രി, തീരദേശവുമായി ബന്ധപ്പെട്ട കാര്യത്തില്‍ ഗൗരവമായ ശ്രദ്ധയുണ്ടാകുമെന്ന് വ്യക്തമാക്കി.