കൊച്ചി: വധഗൂഢാലോചന കേസിലെ മുഖ്യപ്രതി നടന്‍ ദിലീപിന്റെ ഫോണില്‍ നിന്ന് നീക്കിയ 12 ചാറ്റുകളിലൊന്ന് പ്രമുഖ നടിയുടേതെന്ന് കണ്ടെത്തിയ സാഹചര്യത്തില്‍ ഇവരെ ഉടന്‍ ചോദ്യം ചെയ്യും. ചാറ്റ് നീക്കിയതുമായി ബന്ധപ്പെട്ട് ഇവരില്‍ നിന്ന് കൂടുതല്‍ വിവരം ചോദിച്ചറിയുന്നതിന്റെ ഭാഗമായാണ് നടപടി.
നടി നിലവില്‍ വിദേശത്തായതിനാല്‍ ഓണ്‍ലൈന്‍ വഴിയായിരിക്കും ചോദ്യം ചെയ്യല്‍. മുമ്പ് സിനിമകളില്‍ സജീവമായിരുന്ന ഇവര്‍ ഇടയ്ക്ക് ബ്രേക്ക് എടുത്തിരുന്നു. അടുത്തിടെ സമൂഹമാധ്യമങ്ങളിലൂടെ വീണ്ടും സിനിമയില്‍ സജീവമാവുന്നതായി പ്രഖ്യാപനവും നടത്തി. നീക്കം ചെയ്ത ചാറ്റുകളിലുള്‍പ്പെട്ട മറ്റുള്ളവരേയും വരും ദിവസങ്ങളില്‍ ചോദ്യം ചെയ്യും. രണ്ട് പേരെ നേരത്തെ ചോദ്യം ചെയ്തിരുന്നു. തിരുവനന്തപുരം സ്വദേശിനികളായ സിനിമാ സീരിയല്‍ രംഗത്ത് പ്രവര്‍ത്തിക്കുന്നവരെയാണ് ചോദ്യം ചെയ്തത്.
വിദേശത്തുള്ളവരുടെ വിവരം ശേഖരിക്കാന്‍ മൊബൈല്‍ സേവനദാതക്കളെ ക്രൈംബ്രാഞ്ച് സമീപിച്ചെന്നാണ് സൂചന. അതേസമയം, ഏഴാം പ്രതി സായ് ശങ്കറിനെ കണ്ടെത്താനായില്ല. ദിലീപിന്റെ നിര്‍ദേശപ്രകാരം ഇയാളാണ് രണ്ട് ഫോണുകളിലെ വിവരങ്ങള്‍ നീക്കം ചെയ്തത്. അറിഞ്ഞുകൊണ്ട് കുറ്റകൃത്യത്തില്‍ പങ്കാളിയായെന്ന കണ്ടെത്തലിനെ തുടര്‍ന്ന് കഴിഞ്ഞ ദിവസമാണ് സായിയെ പ്രതി ചേര്‍ത്തത്. മുന്‍കൂര്‍ ജാമ്യം നല്‍കിയതിന് പിന്നാലെ ഇയാള്‍ മുങ്ങുകയായിരുന്നു.