ചത്തീസ്ഗഡ് ആരോഗ്യമന്ത്രിയായ ടിഎസ് സിങ് ദോയെ ഉപമുഖ്യമന്ത്രിയാക്കി കോണ്ഗ്രസ്. നിയമസഭ തെരഞ്ഞെടുപ്പിന് ഏതാനും മാസങ്ങള്‍ മാത്രം അവശേഷിക്കവേയാണ് സിങ് ദോയെ ഉപമുഖ്യമന്ത്രിയാക്കാനുള്ള തീരുമാനം. എ.ഐ.സി.സി ജനറല്‍ സെക്രട്ടറി കെസി വേണുഗോപാലാണ് ഇക്കാര്യം പ്രഖ്യാപിച്ചത്.
2018ല്‍ സംസ്ഥാനത്ത് കോണ്ഗ്രസ് വലിയ വിജയം നേടിയതിന് പിന്നാലെ മുഖ്യമന്ത്രി സ്ഥാനത്തേക്ക് പറഞ്ഞുകേട്ട പ്രധാന പേരുകളിലൊന്നായിരുന്നു സിങ് ദോയുടേത്. എന്നാല്‍ മുഖ്യമന്ത്രിയായി ഭൂപേഷ് ഭാഗെലിനെ തിരഞ്ഞെടുക്കുകയായിരുന്നു. രണ്ടര വര്‍ഷം കഴിയുമ്പോള്‍ മുഖ്യമന്ത്രി സ്ഥാനം നല്‍കാമെന്ന് പാര്‍ട്ടി തീരുമാനം ഉണ്ടായിരുന്നുവെന്ന് സിങ് ദോ അവകാശപ്പെട്ടിരുന്നു. സിങ് ദോ വിശ്വസ്തനായ കോണ്ഗ്രസ് നേതാവും മികച്ച ഭരണാധികാരിയാണെന്നും കെ സി വേണുഗോപാല്‍ ട്വീറ്റ് ചെയ്തു. മുഖ്യമന്ത്രി ഭൂപേഷ് ഭാഗെലും സിങ് ദോയെ അഭിനന്ദിച്ച് ട്വീറ്റ് ചെയ്തിട്ടുണ്ട്.