കര്‍ണാടകയിലെ ബി.ജെ.പി സര്‍ക്കാറിന്റെ അഴിമതിക്കെതിരെ കര്‍ണാടക കോണ്‍ഗ്രസ് വ്യാഴാഴ്ച രണ്ടു മണിക്കൂര്‍ സംസ്ഥാന വ്യാപക ബന്ദിന് ആഹ്വനം നല്‍കി. ബി.ജെ.പി എംഎല്‍എ എം. വിരുപക്ഷപ്പക്കുവേണ്ടി മകന്‍ കൈപ്പറ്റിയ കൈക്കൂലി പണമായ എട്ടുകോടി രൂപ ലോകായുക്ത റെയ്ഡില്‍ കണ്ടെടുത്തതിനെ തുടര്‍ന്ന് എം.എല്‍.എ ഒളിവില്‍ പോയിരിക്കുകയാണ്.
അഴിമതി ഭരണം നടത്തുന്ന ബസവരാജ് ബൊമ്മൈയുടെ നേതൃത്വത്തിലുള്ള കര്‍ണാടക സര്‍ക്കാര്‍ രാജിവെക്കണമെന്നാവശ്യപ്പെട്ട് പ്രതിഷേധം ശക്തമാക്കിയിരിക്കുകയാണ് കോണ്‍ഗ്രസ്. വ്യാഴാഴ്ച രാവിലെ 9 മുതല്‍ 11 വരെയാണ് ബന്ദ്. സ്‌കൂളുകളുടെയും കോളജുകളുടെയും ആശുപത്രികളുടെയും പ്രവര്‍ത്തനം ബന്ദില്‍ തടസ്സപ്പെടില്ലെന്നും ഗതാഗതം തടസ്സപ്പെടുത്തില്ലെന്നും കെ.പി.സി.സി പ്രസിഡന്റ് ഡി.കെ. ശിവകുമാര്‍ പറഞ്ഞു.