ബാംഗളൂരു: നടി ഖുശ്ബുവിന് പ്രത്യയശാസ്ത്രപരമായ പ്രതിബദ്ധതയില്ലെന്ന് കോണ്‍ഗ്രസ്. ഖുശ്ബു പാര്‍ട്ടി വിട്ടത് വരാനിരിക്കുന്ന തമിഴ്‌നാട് നിയമസഭ തിരഞ്ഞെടുപ്പിനെ ബാധിക്കില്ലെന്നും സംസ്ഥാനത്തിന്റെ ചുമതല വഹിക്കുന്ന എ.ഐ.സി.സി. ജനറല്‍ സെക്രട്ടറി ദിനേശ് ഗുണ്ടുറാവു വ്യക്തമാക്കി. ഡല്‍ഹിയിലെത്തിയ ഖുഷ്ബു ബിജെപി അംഗത്വം സ്വീകരിക്കുകയായിരുന്നു.
ഖുശ്ബു അങ്ങനെ ചെയ്തത് ദൗര്‍ഭാഗ്യകരമാണെന്നും ഈ നീക്കം തമിഴ്‌നാട് രാഷ്ട്രീയത്തില്‍ യാതൊരു ചലനവും ഉണ്ടാക്കില്ലെന്നും അദ്ദേഹം പറഞ്ഞു. ഈ വിഷയങ്ങള്‍കൊണ്ടൊന്നും ഞങ്ങള്‍ പിന്നോട്ടില്ല. ഖുശ്ബുവിന്റെ നീക്കത്തിന് യാതൊരു സ്വാധീനവും സൃഷ്ടിക്കാനാകില്ല. ഖുശ്ബു ഒരു നടിയായതിനാല്‍ ഈ വിഷയം മാധ്യമങ്ങള്‍ കുറച്ചുദിവസത്തേക്ക് കൈകാര്യം ചെയ്യും. പിന്നീട് ഈ വിഷയം മാഞ്ഞുപോകുമെന്നും ഗുണ്ടുറാവു കൂട്ടിച്ചേര്‍ത്തു.
സംസ്ഥാനത്ത് വലിയതോതില്‍ ബി.ജെ.പി. വിരുദ്ധ വികാരം നിലനില്‍ക്കുന്നതിനാല്‍ ഖുശ്ബുവിന്റെ വരവ് ബി.ജെ.പിക്ക് ഗുണം ചെയ്യില്ലെന്നും ഗുണ്ടുറാവു പറഞ്ഞു. രാഷ്ട്രീയം മാത്രമല്ല, മറ്റു ചില കാരണങ്ങള്‍ കൊണ്ടു കൂടിയാണ് ഖുശ്ബു ബി.ജെ.പിയില്‍ ചേര്‍ന്നതെന്നും അദ്ദേഹം കൂട്ടിച്ചേര്‍ത്തു.