കര്‍ണാടകയിലെ തെരഞ്ഞെടുപ്പ് വിജയത്തില്‍ കോണ്‍ഗ്രസിനെയും, രാഹുല്‍ ഗാന്ധിയെയും അഭിനന്ദിക്കുകയാണെന്നും ഈ വഴി മുന്നേറിയാല്‍ വരുന്ന ലോക്‌സഭാ തെരഞ്ഞെടുപ്പ് വിജയിക്കാനാകുമെന്നും മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി. ഇന്ത്യന്‍ യൂണിയന്‍ മുസ്‌ലിം ലീഗ് ദേശീയ ഉപദേശകസമിതി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഇന്ത്യന്‍ യൂണിയന്‍ മുസ്‌ലിം ലീഗ് സ്ഥാപക അധ്യക്ഷന്‍ ഖാഇദ മില്ലത്ത് മുഹമ്മദ് ഇസ്മായില്‍ സാഹിബിന്റെ സ്മാരകമായി ഡല്‍ഹിയിലെ ‘ഖാഇദ മില്ലത്ത് സെന്റര്‍’ നിര്‍മ്മിക്കും. ഡല്‍ഹിയില്‍ ദേശീയ ആസ്ഥാനം നിര്‍മ്മിക്കുകയും, വരുന്ന ഡിസംബറില്‍ പ്ലാറ്റിനം ജൂബിലിയോട് അനുബന്ധിച്ച് കെട്ടിടം ഉദ്ഘാടനം ചെയ്യുമെന്ന് അദ്ദേഹം പറഞ്ഞു. തമിഴ്‌നാട്, കര്‍ണാടക, മുഖ്യമന്ത്രിമാര്‍ ചടങ്ങില്‍ പങ്കെടുക്കും. പാര്‍ട്ടി മെമ്പര്‍ഷിപ്പ് തുടങ്ങി. രാജ്യത്തെ ന്യൂനപക്ഷങ്ങള്‍ സംരക്ഷിക്കപ്പെടുന്നില്ലെന്നും എല്ലാവരും പരാതിക്കാരാണെന്നും പി.കെ കുഞ്ഞാലിക്കുട്ടി വ്യക്തമാക്കി.