ആലുവ നഗരസഭാ വാച്ച്മാനെ പൊലീസ് ആളുമാറി കസ്റ്റഡിയിലെടുത്തെന്ന് പരാതി. വാച്ച്മാന്‍ സുധീറിനെയാണ് പ്രതിയാണെന്ന് തെറ്റിദ്ധരിച്ച് പെരുമ്പാവൂര്‍ പൊലീസ് കസ്റ്റഡിയിലെടുത്തത്. ആക്രമണ കേസിലെ പ്രതിയെന്ന് തെറ്റിദ്ധരിച്ചാണ് പൊലീസ് സുധീറിനെ കസ്റ്റഡിയിലെടുത്തത്. എന്നാല്‍ കസ്റ്റഡിയിലെടുത്തത് പ്രതിയല്ലാത്ത ആളെയാണെന്ന് ചൂണ്ടിക്കാട്ടി നഗരസഭാ കൗണ്‍സില്‍ പരാതി നല്‍കി. ഇതോടെ സുധീറിനെ വിട്ടയക്കുകയായിരുന്നു.
ഇന്നലെ വൈകീട്ട് 5:30ഓടെയാണ് ഡ്യൂട്ടിയിലുണ്ടായിരുന്ന സുധീറിനെ പൊലീസ് കസ്റ്റഡിയിലെടുത്തത്. സ്റ്റേഷനിലെത്തി കുറച്ചു സമയത്തിനു ശേഷമാണ് കസ്റ്റഡിയിലെടുത്ത ആള്‍ മാറിപ്പോയെന്ന് പൊലീസ് തിരിച്ചറിഞ്ഞത്. ശേഷം ഇയാളെ രാത്രി 9:30ഓടെ വിട്ടയച്ചു.
പൊലീസിന്റെ നടപടിക്കെതിരെ നഗരസഭാ അടിയന്തര യോഗം ചേര്‍ന്ന് പ്രതിഷേധ പ്രമേയം പാസാക്കി. നഗരസഭയിലെ ജീവനക്കാരനെ കസ്റ്റഡിയിലെടുക്കുമ്പോള്‍ ഉയര്‍ന്ന ഉദ്യോഗസ്ഥരെ അറിയിക്കണമെന്ന ചട്ടം പൊലീസ് ലംഘിച്ചെന്ന് പറയുന്നു. സംഭവത്തില്‍ നിയമ നടപടി സ്വീകരിക്കാനാണ് നഗരസഭയുടെ തീരുമാനം.