കോഴിക്കോട്ടെ പ്രമുഖ റിയല്‍ എസ്റ്റേറ്റ് ബിസിനസുകാരനെ ദുരൂഹ സാഹചര്യത്തില്‍ കാണാനില്ലെന്ന് പരാതി. ബാലുശ്ശേരി എരമംഗലം ആട്ടൂര്‍ ഹൗസില്‍ മുഹമ്മദ് അട്ടൂരിനെ(മാമിക്ക-56) ഈമാസം 22ന് ഉച്ചക്ക് ശേഷമാണ് കാണാതായത്. ഭാര്യ റംലത്ത് ടീച്ചറുടെ പരാതിയില്‍ നടക്കാവ് പൊലീസ് കേസ് രജിസ്റ്റര്‍ ചെയ്ത് അന്വേഷണം നടത്തിവരികയാണ്.
ഇപ്പോള്‍ താമസിക്കുന്ന കണ്ണൂര്‍റോഡ് വൈഎംസിഎ ക്രോസ് റോഡിലുള്ള നക്ഷത്ര അപ്പാര്‍ട്ട്‌മെന്റിന്‍ നിന്ന് 21 ന് വീട്ടില്‍ നിന്ന് ഇറങ്ങിയതായിരുന്നു. മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തില്‍ പിറ്റേദിവസം ഉച്ചവരെ അത്തോളി പറമ്പത്ത്,തലക്കുള്ളത്തൂര്‍ ഭാഗങ്ങളില്‍ ഉണ്ടായിരുന്നതായി വിവരം ലഭിച്ചു. പിന്നീട് മുഹമ്മദിനെ അന്വേഷിച്ച് പൊലീസ് ഹൈദരാബാദില്‍ എത്തിയെങ്കിലും കണ്ടെത്താനായില്ല. വിവരം ലഭിക്കുന്നവര്‍ നടക്കാവ് ഇന്‍സ്‌പെകടറുടെ 949798718, 9645005007 നമ്പറില്‍ അറിയിക്കണം.