പൊന്നാനി; വിധവാപെന്‍ഷന്‍ പോലും വെറുതെവിടാതെ ഡിവൈഎഫ്‌ഐ പ്രവര്‍ത്തകന്‍. മലപ്പുറം പൊന്നാനിയില്‍ ഡിവൈഎഫ്‌ഐ പ്രവര്‍ത്തകന്‍ വിധവാപെന്‍ഷന്‍ തട്ടിയെടുത്തതായാണ് പുറത്തുവരുന്ന പരാതി. പൊന്നാനി സ്വദേശി ഐഷാബിയുടെ ഒരു വര്‍ഷത്തെ പെന്ഷന് തുകയാണ് വ്യാജ ഒപ്പിട്ട് തട്ടിയെടുത്തത്. സി.പി.എം നിയന്ത്രണത്തിലുള്ള പൊന്നാനി സര്‍വീസ് സഹകരണ ബാങ്കിലെ ജീവനക്കാരനായ ഡി.വൈ.എഫ്.ഐ. പ്രവര്‍ത്തകനാണ് പണം തട്ടിയതെന്നാണ് ആരോപണം.
2017-ലാണ് പൊന്നാനി കറുകതിരുത്തി സ്വദേശി ഐഷാബി വിധവ പെന്ഷന് അപേക്ഷ നല്‍കിയത്. എന്നാല്‍ ഇതുവരെ ഐഷാബിക്ക് ഒരു രൂപ പോലും പെന്‍ഷനായി ലഭിച്ചില്ല. നഗരസഭയില്‍ അന്വേഷിച്ചപ്പോഴാണ് 2019 ഓഗസ്റ്റ് മുതല്‍ പെന്ഷന് അനുവദിച്ചിട്ടുണ്ടെന്നും, അന്ന് മുതല്‍ ഉള്ള തുക പൊന്നാനി സര്‍വീസ് സഹകരണ ബാങ്കിന് കൈമാറിയിട്ടുണ്ടെന്നും കണ്ടെത്തിയത്. നഗരസഭാ രേഖകള്‍ പ്രകാരം 2019 ഒക്ടോബര്‍ മുതല്‍ 2020 ഓഗസ്റ്റ് വരെയുള്ള 14,900 രൂപ ഐഷാബിക്ക് നല്‍കിയിട്ടുള്ളതായി കണ്ടത്തി. എന്നാല്‍ ഇതില്‍ ഒരു രൂപ പോലും ഇവര്‍ കൈപറ്റിയിട്ടില്ല. ഇവരുടെ പണം വ്യാജ ഒപ്പിട്ട് ബാങ്കിലെ ജീവനക്കാരനും, ഡിവൈഎഫ്‌ഐ പ്രവര്‍ത്തകനുമായ വ്യക്തി തട്ടിയെടുത്തതായാണ് ആരോപണം.
സംഭവത്തെ തുടര്‍ന്ന് പ്രതിഷേധവുമായി യൂത്ത് കോണ്‍ഗ്രസും രംഗത്തെത്തി. കുറ്റക്കാര്‍ക്കെതിരെ നടപടി എടുക്കണമെന്ന് ആവശ്യപ്പെട്ട് കുടുംബം പൊന്നാനി നഗരസഭക്കും പൊലീസിലും പരാതി നല്‍കി.