ഉമ്മുല്‍ഖുവൈന്‍: സുല്‍ത്താനിയ ഫൗണ്ടേഷന്‍ യുഎഇ ഘടകം ഉമ്മുല്‍ഖുവൈനില്‍ ശൈഖ് സുല്‍ത്താന്‍ ശാഹ് ഖാദിരി അനുസ്മരണ സംഗമം ഒരുക്കി. ശൈഖ് മുഹമ്മദ് ബാവ ഉസ്താദ് ഉദ്ഘാടനം ചെയ്തു. മഹാന്‍മാരെ കേവലം വാക്കുകളില്‍ അനുസ്മരിക്കലല്ല, മറിച്ച് അവരുടെ ജീവിതം പൂര്‍ണമായി സ്വയം പകര്‍ത്തുകയും സര്‍വര്‍ക്കും പകര്‍ന്നു കൊടുക്കുകയുമാണ് നാം നിര്‍വഹിക്കേണ്ട ദൗത്യമെന്ന് അദ്ദേഹം ഉദ്‌ബോധിപ്പിച്ചു.
ഓരോ നിമിഷവും അല്ലാഹുവിനു വേണ്ടി ജീവിക്കാന്‍ നാം തയാറാവണം. ശൈഖ് അഹ്മദുല്‍ കബീരി രിഫാഇയും സുല്‍ത്താന്‍ ശാഹ് ഖാദിരിയുമൊക്കെ ജീവിച്ചു കാണിച്ചു തന്നത് നമുക്ക് പ്രചോദനമാണ്. അങ്ങനെ അവര്‍ മരണമില്ലാതെ എക്കാലത്തും ജീവിച്ചു കൊണ്ടേയിരിക്കട്ടെ. എപ്പോഴും ഉണര്‍ന്നു പ്രവര്‍ത്തിച്ചു കൊണ്ടേയിരിക്കണമെന്നും അദ്ദേഹം ആവശ്യപ്പെട്ടു. സയ്യിദ് മുസ്തഫ അല്‍ ഐദറൂസി ആധ്യക്ഷ്യം വഹിച്ചു. അബ്ദുന്നാസിര്‍ മഹ്ബൂബി, നബീല്‍ മഹ്ബൂബി തുടങ്ങിയവര്‍ അനുസ്മരണ പ്രഭാഷണം നടത്തി.