ബ്രസീലിയന്‍ താരം സാവിഞ്ഞോയെ സ്വന്തമാക്കി ഇംഗ്ലീഷ് വമ്പന്മാരായ മാഞ്ചസ്റ്റര്‍ സിറ്റി. ഫ്രഞ്ച് ക്ലബ് ട്രോയസിന്റെ താരമായിരുന്ന സാവീഞ്ഞോ കഴിഞ്ഞ സീസണില്‍ ലോണില്‍ ജിറോണക്ക് വേണ്ടി കളിക്കുകയായിരുന്നു. ജിറോണയെ ലാലിഗയില്‍ മൂന്നാം സ്ഥാനത്തെത്തിക്കുന്നതില്‍ താരം നിര്‍ണായക പങ്കുവഹിച്ചിരുന്നു. സീസണില്‍ 11 ഗോള്‍ നേടുകയും 10 അസിസ്റ്റുകള്‍ നല്‍കുകയും ചെയ്ത 20കാരനെ 40 ദശലക്ഷം യൂറോ മുടക്കിയാണ് സിറ്റി സ്വന്തമാക്കിയത്.
ലോകത്തെ മികച്ച ടീമാണ് മാഞ്ചസ്റ്റര്‍ സിറ്റിയെന്നും എക്കാലത്തെയും മികച്ച പരിശീലകരിലൊരാളായ പെപ് ഗാര്‍ഡിയോളക്ക് കീഴില്‍ കളിക്കാന്‍ അവസരം ലഭിക്കുന്നതില്‍ ആവേശഭരിതനാണെന്നും വിംഗറായ സാവിഞ്ഞോ പ്രതികരിച്ചു.
2022ല്‍ ട്രോയസില്‍ ചേരുന്നതിന് മുമ്പ് ബ്രസീല്‍ ക്ലബ് അത്‌ലറ്റികോ മിനെയ്‌റോയിലായിരുന്നു സാവിയോ എന്ന് വിളിപ്പേരുള്ള സാവിഞ്ഞോ. ഇംഗ്ലണ്ടിനെതിരായ മത്സരത്തില്‍ ബ്രസീലിനായി അരങ്ങേറിയ സാവിഞ്ഞോ കഴിഞ്ഞ കോപ അമേരിക്കയില്‍ പരാഗ്വെക്കെതിരായ ഗ്രൂപ്പ് മത്സരത്തില്‍ ആദ്യ ഗോളും സ്വന്തമാക്കിയിരുന്നു.