ആലപ്പുഴ: നോക്കുകൂലി വാങ്ങരുതെന്ന മുഖ്യമന്ത്രിയുടെ വാക്കിന് പുല്ലുവില കല്‍പിച്ച് സി.ഐ.ടി.യു. വീടുപണിക്കുള്ള സിമന്റ് ലോറിയില്‍ നിന്ന് ഇറക്കാന്‍ ശ്രമിച്ച ഗ്രഹനാഥന്റെ കൈ സി.ഐ.ടി.യു തൊഴിലാളികള്‍ തല്ലിയൊടിച്ചു. കുമരകത്തെ ആംബുലന്‍സ് ഡ്രൈവര്‍ ശ്രീകുമാരമംഗലം വായിത്ര ആന്റണിക്കാണ് മര്‍ദ്ദനമേറ്റത്.
വീട് പണിക്കായി എത്തിച്ച സിമന്റ് ആന്റണിയും മകന്‍ ജോയലും ചേര്‍ന്ന് ഇറക്കുകയായിരുന്നു. ഇതിനിടെ സ്ഥലത്തെത്തിയ സി.ഐ.ടി.യുക്കാര്‍ ലോഡ് ഇറക്കാന്‍ അനുവദിക്കില്ലെന്ന് പറഞ്ഞ് പ്രശ്‌നമുണ്ടുക്കി. ഇത് വകവെക്കാതെ ലോറിയില്‍ കയറി സിമന്റ് ഇറക്കാന്‍ ശ്രമിച്ച ആന്റണിയെ സി.ഐ.ടി.യു പ്രവര്‍ത്തകര്‍ ലോറിയില്‍ നിന്ന് വലിച്ച് താഴെയിട്ട് മര്‍ദ്ദിക്കുകയായിരുന്നു.
മെയ് ഒന്ന് മുതല്‍ കേരളം നോക്കുകൂലി വിമുക്ത സംസ്ഥാനമായിരിക്കുമെന്ന് മുഖ്യമന്ത്രി പറഞ്ഞിരുന്നു. ഈ പ്രഖ്യാപനത്തിന് പുല്ലുവില കല്‍പിച്ചാണ് മുഖ്യമന്ത്രിയുടെ പാര്‍ട്ടിയുടെ തൊഴിലാളി സംഘടന തന്നെ നോക്കുകൂലി ആവശ്യപ്പെട്ട് അതിക്രമം നടത്തിയിരിക്കുന്നത്.