സംസ്ഥാനത്ത് സിനിമാ തിയറ്ററുകള്‍ ഇന്നും നാളെയും അടച്ചിടും. ഫിയോക്കിന്റെ അധ്യക്ഷതയില്‍ കൊച്ചിയില്‍ ചേര്‍ന്ന യോഗത്തിലാണ് തീരുമാനം. ‘2018’ സിനിമ കരാര്‍ ലംഘിച്ച് ഒടിടിക്കു നേരത്തെ നല്‍കിയതില്‍ പ്രതിക്ഷേധിച്ചാണ് സൂചന പണിമുടക്ക്. ഇന്നും നാളെയുമായി സിനിമ കാണുന്നതിനായി ഓണ്‍ലൈനില്‍ ബുക്ക് ചെയ്ത ടിക്കറ്റുകളുടെ തുക റീഫണ്ട് ചെയ്യുമെന്ന് ഉടമകള്‍ പറഞ്ഞു.
സിനിമ തിയറ്ററില്‍ റിലീസ് ചെയ്ത് 42 ദിവസം കഴിഞ്ഞാല്‍ മാത്രമേ ഒടിടി പ്ലാറ്റ്‌ഫോമില്‍ റിലീസ് ചെയ്യാവൂ എന്നായിരുന്നു തിയറ്റര്‍ ഉടമകളും നിര്‍മാതാക്കളും തമ്മിലുള്ള ധാരണ. മലയാളത്തില്‍ അടുത്തകാലത്ത് ഏറ്റവും വലിയ ഹിറ്റായ ‘2018’ ഇന്ന് സോണി ലൈവിലൂടെ ഒടിടി റിലീസ് ചെയ്തിരിക്കുകയാണ്. ചിത്രം പുറത്തിറങ്ങി 33-ാം ദിവസമാണ് ഒടിടിയിലൂടെ റിലീസ് ചെയ്യുന്നത്.