പള്ളി നിര്‍മിക്കുന്നത് ലവ് ജിഹാദിലേക്ക് നയിക്കുമെന്ന് അവകാശപ്പെട്ട് നിര്‍മാണ പ്രവര്‍ത്തനം തടഞ്ഞ് ബജ്‌റംഗ്ദള്‍ പ്രവര്‍ത്തകര്‍. ഛത്തീസ്ഗഡിലെ രാജ്‌നന്ദ്ഗാവില്‍ വെള്ളിയാഴ്ചയാണ് സംഭവം നടന്നത്. പള്ളി പണിയുന്നതിനെതിരെ നാട്ടുകാരെ അണിനിരത്തി ബജ്‌റംഗ്ദള്‍ പ്രവര്‍ത്തകര്‍ നടത്തിയ പ്രതിഷേധം പ്രദേശത്ത് സംഘര്‍ഷാവസ്ഥ ഉടലെടുക്കുന്നതിന് കാരണമായെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
പള്ളിയുടെ സാന്നിധ്യം പ്രദേശത്ത് ലവ് ജിഹാദ്, കന്നുകാലി കശാപ്പ്, അനധികൃത ബംഗ്ലാദേശി കുടിയേറ്റം എന്നിവ വര്‍ധിക്കുന്നതിന് കാരണമാകുമെന്ന് അവകാശപ്പെട്ടാണ് സംഘം നിര്‍മാണം തടഞ്ഞത്.
പള്ളി പണിയുന്ന പ്രദേശത്തിന് സമീപം ജനക്കൂട്ടത്തെ എത്തിച്ച് ബജ്‌റംഗ്ദള്‍ പ്രവര്‍ത്തകര്‍ പ്രതിഷേധിക്കുകയായിരുന്നു. നിര്‍മാണം നിര്‍ത്തിയില്ലെങ്കില്‍ പ്രദേശത്തെ സാമുദായിക സൗഹാര്‍ദ്ദം തകര്‍ക്കുമെന്നും ഇവര്‍ ഭീഷണി മുഴക്കി. ഇതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
ബി.ജെ.പി ഭരിക്കുന്ന സംസ്ഥാനത്ത് ന്യൂനപക്ഷങ്ങള്‍ക്കെതിരായ അക്രമങ്ങള്‍ പതിവാണ്. സംസ്ഥാനത്ത് ആള്‍ക്കൂട്ട കൊലപാതകങ്ങളും ആക്രമണങ്ങളും വ്യാപകമായി റിപ്പോര്‍ട്ട് ചെയ്യപ്പെടാറുണ്ട്.