കൊല്ലം ഓയൂരില്‍ 6 വയസുകാരിയെ തട്ടിക്കൊണ്ടുപോയ അജ്ഞാത സംഘത്തെ കണ്ടെത്താന്‍ പൊലീസ് അന്വേഷണം മൂന്നാം ദിവസത്തിലേക്ക്. രേഖ ചിത്രങ്ങള്‍ പുറത്തുവിട്ടതിലൂടെ അന്വേഷണത്തിന് സഹായകരമാകുന്ന വിവരങ്ങള്‍ ഒന്നും ലഭിച്ചിട്ടില്ലെന്നാണ് സൂചന.
ആറുവയസുകാരിയെ തട്ടിക്കൊണ്ടു പോകാന്‍ ഉപയോഗിച്ച വാഹനം കണ്ടെത്താന്‍ കഴിയാത്തതും അന്വേഷണസംഘത്തെ കുഴക്കുകയാണ്. അതേസമയം അബിഗേലിന്റെ പിതാവ് റെജിയുടെ സാമ്പത്തിക ഇടപാടുകള്‍ സംബന്ധിച്ചുള്ള വിശദമായ അന്വേഷണവും പൊലീസ് നടത്തുന്നുണ്ട്.
കൊല്ലം റൂറല്‍ എസ്പിയുടെ നേതൃത്വത്തില്‍ ജില്ലയിലെ മുഴുവന്‍ ഡിവൈഎസ്പി മാരും ഉള്‍പ്പെടുന്ന സംഘമാണ് അജ്ഞാത സംഘത്തെ കണ്ടെത്തുന്നതിനു വേണ്ടി തിരച്ചില്‍ ഊര്‍ജ്ജിതമാക്കിയിരിക്കുന്നത്. ജില്ലയ്ക്ക് പുറത്തേക്കും അന്വേഷണം വ്യാപിപ്പിച്ചിട്ടുണ്ട്.
അതേസമയം, കുട്ടിയെ തട്ടിക്കൊണ്ടുപോയ ഓയൂരില്‍ നിന്ന് 10 കിലോമീറ്റര്‍ അകലെ ചാത്തന്നൂരിനടുത്തേക്കെത്തുന്ന പ്രതികളുടെ ദൃശ്യങ്ങള്‍ ലഭിച്ചിട്ടിട്ടുണ്ട്. ഇതില്‍ പ്രതികളുടെ മുഖം വ്യക്തമാണെന്നാണ് സൂചന.