ആലപ്പുഴ: യുവതിയെ പിന്തുടര്‍ന്നു സ്വര്‍ണമാല പൊട്ടിച്ചു രക്ഷപ്പെട്ട പ്രതി പൊലീസ് പിടിയില്‍. സ്‌കൂട്ടറില്‍ സഞ്ചരിക്കുകയായിരുന്ന യുവതിയെ ബൈക്കില്‍ ഹെല്‍മറ്റ് വച്ച് പ്രതി പിന്തുടര്‍ന്നാണ് നാല് പവന്റെ മാല കവര്‍ന്നത്. കാര്‍ത്തികപ്പള്ളി മഹാദേവികാട് അജിത്ത് ഭവനത്തില്‍ അജിത്തിനെയാണ് (39) ഹരിപ്പാട് പൊലീസ് അറസ്റ്റ് ചെയ്തത്.
സ്‌കൂട്ടറില്‍ പുലര്‍ച്ചെ അമ്പലത്തിലേക്ക് പോയ തെക്കേക്കര രാധാകൃഷ്ണ പിള്ളയുടെ ഭാര്യ വത്സലയുടെ മാലയാണ് പ്രതി പൊട്ടിച്ചത്. യുവതി സ്‌കൂട്ടറില്‍ യാത്ര ചെയ്ത് വരുന്ന സമയത്ത് പിറകില്‍ മറ്റൊരു ബൈക്കില്‍ വന്ന പ്രതി മാല വലിച്ച് പൊട്ടിക്കുകയായിരുന്നു. പിടിവലിയുടെ ആഘാതത്തില്‍ യുവതി ബൈക്കില്‍ നിന്നും താഴെ വീണ് അലറി വിളിച്ചു. പുലര്‍ച്ചെ ആയതിനാല്‍ ഈ സമയം തൊട്ടടുത്ത് ആരും ഉണ്ടായിരുന്നില്ല. പിന്നീട് യുവതിയുടെ പരാതിയുടെ അടിസ്ഥാനത്തില്‍ കേസെടുത്ത ഹരിപ്പാട് പൊലീസ് സിസിടിവി ദൃശ്യങ്ങള്‍ പരിശോധിച്ച് ബൈക്ക് മനസിലാക്കിയാണ് പ്രതിയെ പിടിച്ചത്.