ഡോക്ടര്‍ വന്ദനയെ കുത്തിക്കൊന്ന കേസില്‍ എഫ്‌ഐആര്‍ പുറത്ത്. ഡ്രസ്സിംഗ് റൂമില്‍ ഉപയോഗിക്കുന്ന കത്രിക ഉപയോഗിച്ചാണ് കൃത്യം നടത്തിയതെന്നും വന്ദനയെ പ്രതി സന്ദീപ് പിന്തുടര്‍ന്ന് കുത്തിയതാണെന്നും എഫ്‌ഐആറില്‍ പറയുന്നു. യാതൊരു പ്രകോപനവും ഇല്ലാതെയാണ് വന്ദനയുടെ തലയ്ക്ക് പ്രതി കുത്തിയത്.
11 കുത്തുകള്‍ ഏറ്റതായി പ്രാഥമിക പോസ്റ്റുമോര്‍ട്ടം റിപ്പോര്‍ട്ടുകള്‍ നിന്ന് വ്യക്തമായിരുന്നു. തലയിലും മുതുകിലുമേറ്റ കുത്തുകളാണ് മരണത്തിന് കാരണമായത്. അതിനിടെ കൊലപാതകത്തില്‍ പൊലീസ് നിലപാട് മാറ്റി. പ്രതി സന്ദീപ് ആദ്യം കുത്തിയത് കൊല്ലപ്പെട്ട വന്ദന ദാസിനെ എന്നാണ് എഫ്‌ഐആറില്‍ പറയുന്നത്. സന്ദീപിന്റെ ബന്ധുവിനും പൊലീസിനുമാണ് ആദ്യം കുത്തേറ്റത് എന്നാണ് നേരത്തെ പൊലീസ് അറിയിച്ചിരുന്നത്.
അതേസമയം കേസിലെ പ്രതി സന്ദീപ് റിമാന്‍ഡില്‍. 14 ദിവസത്തേക്കാണ് റിമാന്‍ഡ് ചെയ്തത്. സന്ദീപിനെ പൂജപ്പുര സെന്‍ട്രല്‍ ജയിലിലേക്ക് കൊണ്ടുപോയി.