പുല്‍പ്പള്ളി: മുള്ളന്‍കൊല്ലി പഞ്ചായത്തില്‍ കന്നുകാലികളില്‍ ചര്‍മ്മ മുഴ പടരുന്നു. പ്രതിരോധ കുത്തിവയ്‌പെടുത്ത പശുക്കള്‍ കുഴഞ്ഞു വീണതായി കര്‍ഷകര്‍ പറഞ്ഞു. തറപ്പത്തുകവല ഫാം ഉടമ ചെറിയന്പനാട്ട് അപ്പച്ചന്റെ പശുക്കള്‍ ഇന്നലെ തൊഴുത്തില്‍ കുഴഞ്ഞു വീണു. ഫാമിലെ 45 പശുക്കള്‍ക്ക് അഞ്ച് ദിവസം മുന്‍പ് മൃഗസംരക്ഷണ വകുപ്പ് കുത്തിവയ്പ് നടത്തി. 20 ലിറ്റര്‍ കറവയുളള ഒരു പശുവിന് ഇപ്പോള്‍ പാല്‍ ലഭിക്കുന്നില്ല. ഗര്‍ഭമുള്ള രണ്ട് പശുക്കളാണ് രോഗം മുര്‍ച്ഛിച്ച് അവശനിലയിലായത്. ബ്ലോക്ക് പഞ്ചായത്തിന്റെ സഞ്ചരിക്കുന്ന മൃഗചികിത്സാ വിഭാഗം സ്ഥലത്തെത്തി പശുക്കള്‍ക്ക് ചികിത്സ നല്‍കി. വീണു കിടക്കുന്ന ഇവയെ എഴുന്നേല്‍പിക്കാനുള്ള ശ്രമം നടന്നു വരുന്നു. പ്രതിരോധ കുത്തിവയ്പിന്റെ പ്രതിപ്രവര്‍ത്തനമാണ് പശുക്കളെ അവശരാക്കിയതെന്ന് ഫാം ഉടമ അപ്പച്ചന്‍ പറയുന്നു.
ഫാമിലെ എല്ലാ പശുക്കള്‍ക്കും രോഗം പടരുന്നുണ്ട്. ചര്‍മ്മ മുഴ ശരീരമാകെ വ്യാപിച്ച് പശുക്കള്‍ അവശനിലയിലാകുകയാണ്. കബനിഗിരിയിലും പശുക്കള്‍ക്ക് ചര്‍മ്മ മുഴ രോഗം വ്യാപിക്കുന്നുണ്ട്. രോഗവ്യാപനം തടയാന്‍ മൃഗസംരക്ഷണവകുപ്പിന്റെ ഭാഗത്ത് നിന്ന് അടിയന്തിര പ്രതിരോധ നടപടി സ്വീകരിക്കണമെന്നാണ് ക്ഷീര കര്‍ഷകരുടെ ആവശ്യം.