കോഴിക്കോട് കുറ്റിയാടിയില്‍ ചികിത്സയ്‌ക്കെത്തിയ രോഗിയോട് മോശമായി പെരുമാറിയതിന് ഡോക്ടര്‍ക്കെതിരെ നടപടി. അറസ്റ്റിലായ ഡോക്ടറെ ആരോഗ്യവകുപ്പ് ഡയറക്ടര്‍ അന്വേഷണ വിധേയമായി സസ്‌പെന്‍ഡ് ചെയ്തു. കുറ്റിയാടി താലൂക്ക് ആശുപത്രിയിലെ കാഷ്വാലിറ്റി മെഡിക്കല്‍ ഓഫീസറായ ഡോ. വിപിന്‍ വി.ബിയ്‌ക്കെതിരെയാണ് നടപടി.
മാര്‍ച്ച് 14ന് കുറ്റിയാടി താലൂക്ക് ആശുപത്രിയിലെ അത്യാഹിത വിഭാഗത്തിലെ സ്ത്രീകളോട് മദ്യപിച്ച്, പമര്യാദയായി പെരുമാറിയതിനെ തുടര്‍ന്നാണ് ഈ നടപടി. മുന്‍പ് ഈ ഡോക്ടര്‍ ആശുപത്രി സൂപ്രണ്ടിനെ കയ്യേറ്റം ചെയ്യാന്‍ ശ്രമിക്കുകയും ജീവനക്കാരോട് അപമര്യാദയായി പെരുമാറുകയും ചെയ്തതായി ആരോഗ്യവകുപ്പ് ഡയറക്ടര്‍ക്ക് റിപ്പോര്‍ട്ട് ലഭിച്ചിട്ടുണ്ട്. ഇദ്ദേഹം അത്യാഹിത വിഭാഗത്തിലെ ചികിത്സയില്‍ അലംഭാവം കാണിക്കുന്നതായും പരാതി ഉയര്‍ന്നിരുന്നു.