അനധികൃതമായി പാര്‍ക്ക് ചെയ്ത ലോറിക്ക് പിന്നില്‍ കാര്‍ ഇടിച്ച് യുവതി മരിച്ചു. അരൂര്‍-കുമ്പളം ദേശീയപാതയില്‍ ടോള്‍ പ്ലാസയ്ക്ക് സമീപമാണ് അപടം നടന്നത്. തിരുവല്ല സ്വദേശിനി രശ്മി (39) ആണ് മരിച്ചത്. അപകടത്തില്‍ കാറിന്റെ മുന്‍വശം പൂര്‍ണമായും തകര്‍ന്നു. കാര്‍ പൊളിച്ചാണ് രശ്മിയെ പുറത്തെടുത്തത്. രശ്മിയുടെ ഭര്‍ത്താവ് പ്രമോദ് (41), മകന്‍ ആരോണ്‍ (15) എന്നിവര്‍ക്ക് സാരമായി പരിക്കേറ്റു.
തിരുവല്ലയില്‍ നിന്ന് ബെംഗളൂരുവിലേക്കു പോകുന്നതിനിടെയാണഅ അപകടം. പ്രമോദ് ഓടിച്ചിരുന്ന കാര്‍ ടോള്‍ പ്ലാസയ്ക്ക് സമീപം നിര്‍ത്തിയിട്ടിരുന്ന ലോറിയുടെ പിന്നിലേയ്ക്ക് ഇടിച്ചു കയറുകയായിരുന്നു. രശ്മി ഇരുന്നിരുന്ന ഭാഗത്ത് എയര്‍ബാഗ് ഉണ്ടായിരുന്നെങ്കിലും അത് തുണച്ചില്ല. പ്രമോദിന്റെ ഭാഗത്തെ ഡോര്‍ തുറക്കാന്‍ സാധിച്ചതിനാല്‍ അദ്ദേഹം പുറത്തിറങ്ങി. ഈ സമയം സംഭവ സ്ഥലത്തേക്ക് നാട്ടുകാര്‍ ഓടിക്കൂടിയിരുന്നു. പിന്‍സീറ്റിലിരുന്ന ആരോണിനെ ഏറെ നേരം ശ്രമിച്ച ശേഷമാണ് പുറത്തെടുക്കാനായത്. രശ്മിയെ പുറത്തെടുക്കാന്‍ ശ്രമിച്ചെങ്കിലും ലോക്ക് അഴിക്കാന്‍ കഴിയാത്തത് വെല്ലുവിളിയാവുകയായിരുന്നു. തുടര്‍ന്ന് ഫയര്‍ഫോഴ്സ് എത്തി കാര്‍ വെട്ടിപ്പൊളിച്ചാണ് രശ്മിയെ പുറത്തെടുത്തത്. മരടിലെ സ്വകാര്യ ആശുപത്രിയില്‍ എത്തിച്ചെങ്കിലും രശ്മിയുടെ ജീവന്‍ രക്ഷിക്കാനായില്ല.
കുമ്പളത്തെ ദേശീയപാതയോരത്ത് പാര്‍ക്കിങ് നിരോധിച്ചിരുന്നു. ഇതിന് പുറമേ ബോര്‍ഡ് സ്ഥാപിക്കുകയും ചെയ്തിരുന്നു. എന്നാല്‍ ഇവിടെ അനധികൃതമായി ലോറികള്‍ പാര്‍ക്ക് ചെയ്യുന്നത് പതിവാണ്.