കാറും ലോറിയും കൂട്ടിയിടിച്ച് ഗുരുതര പരിക്കേറ്റ് ചികിത്സയിലിരിക്കെ സ്ത്രീ മരിച്ചു. അരീക്കോട് – കിഴിശ്ശേരി കടുങ്ങല്ലൂർ സ്വദേശി സുഹ്റ (48) ആണ് മരിച്ചത്. ഇവരും കുടുംബവും സഞ്ചരിച്ച കാർ എടവണ്ണ കൊയിലാണ്ടി സംസ്ഥാനപാതയിലെ കുഞ്ഞംപടിയിൽ വെച്ച് ആണ് ലോറിയുമായി കൂട്ടിയിടിച്ച് അപകടം സംഭവിച്ചത്.
കാറിൽ കുട്ടികളും സ്ത്രീകളും ഉൾപ്പെടെ 12 പേരാണ് ഉണ്ടായിരുന്നത്. കുടുംബം സഞ്ചരിച്ച കാർ മുക്കം ഭാഗത്തുനിന്ന് വരുകയായിരുന്നു. ഇതേസമയം അരീക്കോട് ഭാഗത്തുനിന്ന് വരികയായിരുന്ന ലോറിയും കൂട്ടിയിടിച്ചാണ് അപകടം ഉണ്ടായത്. തുടർന്ന് പ്രദേശവാസികൾ ഓടിയെത്തി ഉടൻ തന്നെ രക്ഷാപ്രവർത്തനം നടത്തി. ഇവരെ ഉടൻതന്നെ അരീക്കോട്ടെ സ്വകാര്യ ആശുപത്രിയിൽ പ്രവേശിപ്പിച്ചു.
അപകടത്തിൽ കാറിൽ ഉണ്ടായിരുന്ന നാലുപേർക്ക് ഗുരുതര പരിക്കേറ്റിട്ടുണ്ട്. ബാക്കിയുള്ളവർ നിസ്സാരപരിക്കുകളോട് രക്ഷപ്പെട്ടു. തലക്കും വയറിനു ഉൾപ്പെടെ ഗുരുതര പരിക്കേറ്റ മൂന്ന് പേർ അരീക്കോട്ടെ സ്വകാര്യ ആശുപത്രിയിൽ ചികിത്സയിലായിരുന്നു. മൂന്ന് വയസായ ഒരു കുട്ടി കോഴിക്കോട്ടെ സ്വകാര്യ ആശുപത്രിയിലും ചികിത്സയിയിരുന്നു.
ഇതിനിടയിലാണ് അരീക്കോട് സ്വകാര്യ ആശുപത്രിയിൽ ചികിത്സയിലിരിക്കെ സുഹറ മരണത്തിന് കീഴടങ്ങിയത്. അപകടത്തിൽ സുഹറക്ക് തലക്ക് ഗുരുതരമായ പരിക്കേറ്റിരുന്നു. മയ്യിത്ത് അരീക്കോട് പോലീസിന്റെ നേതൃത്വത്തിൽ തുടർനടപടികൾ പൂർത്തിയാക്കി മഞ്ചേരി മെഡിക്കൽ കോളേജ് ആശുപത്രിയിൽ നിന്ന് പോസ്റ്റ്മോർട്ടത്തിനുശേഷം ബന്ധുക്കൾക്ക് വിട്ടുനൽകി.