കൊച്ചി: കഴിഞ്ഞ സീസണില്‍ ബ്ലാസ്റ്റേഴ്സിനായി മികച്ച പ്രകടനം നടത്തിയ അര്‍ജന്റീനന്‍ താരം ജോര്‍ഗെ പെരേര ഡിയസ് ക്ലബ്ബ് വിട്ടു. താരത്തിന്റെ സേവനങ്ങള്‍ക്ക് നന്ദി പറയുന്നതയി അറിയിച്ച് ക്ലബ്ബ് സമൂഹമാധ്യമങ്ങളില്‍ കുറിപ്പ് പോസ്റ്റ് ചെയ്തു. ലോണ്‍ അടിസ്ഥാനത്തില്‍ കഴിഞ്ഞ സീസണില്‍ ബ്ലാസ്റ്റേഴ്‌സിലെത്തിയ താരം, സീസണ്‍ കഴിഞ്ഞതോടെ അര്‍ജന്റീനന്‍ ക്ലബായ പ്ലാറ്റന്‍സിലേക്ക് തിരികെ പോയിരുന്നു. പ്ലാറ്റന്‍സിലെ കരാര്‍ അവസാനിപ്പിച്ച് താരത്തെ വീണ്ടും ടീമിലെത്തിക്കാനായിരുന്നു ബ്ലാസ്റ്റേഴ്‌സിന്റെ ശ്രമം. ബ്ലാസ്റ്റേഴ്സിനായി എട്ട് ഗോളുകളും ഒരു അസിസ്റ്റും നേടിയ ഡിയസ് ടീമിനെ ഫൈനല്‍ വരെ എത്തിക്കുന്നതിലും നിര്‍ണായക പങ്കുവഹിച്ചിരുന്നു. നേരത്തെ മലേഷ്യന്‍ ക്ലബ്ബായ ജോഹറിന് വേണ്ടി സീസണില്‍ 30 ഗോളുകള്‍ നേടി ഡിയസ് റെക്കോഡിട്ടിരുന്നു.
ഭൂട്ടാന്‍ താരം ചെഞ്ചോ ഗില്‍ഷന്‍, അല്‍വാരോ വാസ്‌ക്വസ്, എനെസ് സിപോവിച്ച് എന്നീ വിദേശ താരങ്ങള്‍ നേരത്തെ ക്ലബ്ബ് വിട്ടിരുന്നു. അതേസമയം അടുത്ത സീസണിനായി ഇതുവരെ ഒരു വിദേശ താരത്തെ മാത്രമാണ് ക്ലബ്ബ് പുതുതായി സൈന്‍ ചെയ്തത്. ഓസ്‌ട്രേലിയന്‍ സ്‌െ്രെടക്കറായ അപ്പോസ്‌തൊലോസ് ജിയാനുവിനെയാണ് കഴിഞ്ഞ ദിവസം ടീമിലെത്തിച്ചത്. കൂടുതല്‍ വിദേശ താരങ്ങളെ ടീമിലെത്തിക്കുന്നതിനുള്ള ചര്‍ച്ചകള്‍ അന്തിമഘട്ടത്തിലാണെന്നാണ് സൂചന.