വന്യജീവി സങ്കേതങ്ങള്‍ക്ക് ഒരു കിലോമീറ്റര്‍ പരിധിയില്‍ വരുന്ന ബഫര്‍സോണ്‍ പ്രഖ്യാപിച്ച വിധിയില്‍ കൂടുതല്‍ വ്യക്തത തേടി കേന്ദ്രസര്‍ക്കാരും ഇളവുതേടി കേരളം ഉള്‍പ്പെടെയുള്ള സംസ്ഥാനങ്ങളും നല്‍കിയ ഹര്‍ജിയില്‍ സുപ്രീംകോടതിയുടെ മൂന്നംഗ ബെഞ്ച് പരിഗണിക്കും. ഇന്ന് ഹര്‍ജികള്‍ പരിഗണിച്ച, ജസ്റ്റിസ് ബിആര്‍ ഗവായ് അധ്യക്ഷനായ രണ്ടംഗ ബെഞ്ച് മൂന്നംഗ ബെഞ്ച് വിധി പരിഗണിക്കുന്നതാവും കൂടുതല്‍ നല്ലതെന്ന് വ്യക്തമാക്കി. എന്നാല്‍ വിധിയില്‍ ഭേദഗതി വേണമെന്ന് വിവിധ സംസ്ഥാനങ്ങള്‍ ആവശ്യപ്പെട്ടു. വ്യക്തത വേണ്ടതുണ്ടെന്ന് കേന്ദ്രസര്‍ക്കാരും നിലപാടെടുത്തു. ബഫര്‍സോണ്‍ മേഖലകള്‍ ജനങ്ങള്‍ക്കു പ്രശ്‌നങ്ങള്‍ ഉണ്ടാക്കുന്നുണ്ടെന്ന്, അമിക്കസ് ക്യൂറി കെ പരമേശ്വ കോടതിയെ അറിയിച്ചു. ഇതിനെ തുടര്‍ന്നാണ് മൂന്നംഗ ബെഞ്ചിന് വിടാമെന്ന തീരുമാനത്തില്‍ കോടതി എത്തിയത്.