മുംബൈയില്‍ അധ്യാപികയുടെ ക്രൂര മര്‍ദനത്തിന് ഇരയായ 9 വയസുകാരി ഗുരുതരാവസ്ഥയില്‍. കുട്ടിയുടെ ചെവിക്ക് അധ്യാപിക അടിച്ചതിനെ തുടര്‍ന്ന് മസ്തിഷ്‌കാഘാതം സംഭവിച്ചതോടെ കുട്ടിയെ വെന്റിലേറ്ററില്‍ പ്രവേശിപ്പിച്ചിരുന്നു.
മുംബൈയിലെ നല്ലസോപാര എന്ന സ്ഥലത്ത് ഒക്ടോബര്‍ അഞ്ചിാണ് സംഭവം നടന്നത്. പെണ്‍കുട്ടിയുടെ മാതാപിതാക്കള്‍ നല്‍കിയ പരാതിയുടെ അടിസ്ഥാനത്തില്‍ അധ്യാപികയ്ക്കെതിരെ എഫ്.ഐ.ആര്‍. രജിസ്റ്റര്‍ ചെയ്തിട്ടുണ്ട്. കേസെടുത്തതിനു പിന്നാലെ അധ്യാപിക ഒളിവില്‍ പോയിരുന്നു. ഇതിനാല്‍ അധ്യാപികക്കു വേണ്ടി ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ട്.
ക്ലാസില്‍ അനുസരണക്കേട് കാണിച്ചെന്നാരോപിച്ച് സ്വകാര്യ ട്യൂഷന്‍ അധ്യാപികയായ രത്ന സിങ് വിദ്യാര്‍ത്ഥിയായ ദീപികയെ ക്രൂരമായി മര്‍ദിക്കുകയായിരുന്നു. അടിയുടെ ആഘാതത്തില്‍ കുട്ടി ധരിച്ചിരുന്ന കമ്മല്‍ കവിളില്‍ തുളഞ്ഞുകയറുകയായിരുന്നു. തുടര്‍ന്ന് കുട്ടിയുടെ കേള്‍വി ശക്തിക്ക് പ്രശ്നങ്ങളുണ്ടായി. എന്നാല്‍ കുട്ടിയുടെ ആരോഗ്യസ്ഥിതി വഷളായതിനെ തുടര്‍ന്ന് മുംബൈയിലെ കെ.ജെ സോമയ്യ ആശുപത്രിയില്‍ പ്രവേശിപ്പിച്ചു.
ഒമ്പത് ദിവസങ്ങളായി കുട്ടി വെന്റിലേറ്ററില്‍ കഴിയുകയാണ്. കുട്ടിയുടെ ആരോഗ്യസ്ഥിതി ഗുരുതരമാണെന്ന് ആശുപത്രി അധികൃതര്‍ അറിയിച്ചു. മസ്തിഷ്‌കാഘാതം സംഭവിച്ച കുട്ടിയുടെ താടിയെല്ലിനും ശ്വാസനാളത്തിനും ഗുരുതരമായി പരിക്കേറ്റിട്ടുണ്ട്. ടെറ്റനസ് അണുബാധയുമുണ്ടെന്നും ഡോക്ടര്‍മാര്‍ അറിയിച്ചു.