മുംബൈ: വിചാരണാ നടപടികള്‍ നീണ്ടു പോകുന്നതിന്റെ പേരില്‍ ഒരാളെ അനിശ്ചിത കാലത്തേക്ക് തടവില്‍ പാര്‍പ്പിക്കാന്‍ കഴിയില്ലെന്ന് ബോംബെ ഹൈക്കോടതി. അത് ഭരണഘടന ഉറപ്പു നല്‍കുന്ന മൗലികാവകാശത്തിന്റെ ലംഘനമാണെന്നും കേസിന്റെ സ്വഭാവവും ഗൗരവവും കണക്കിലെടുത്ത് ഇളവുകള്‍ അനുവദിക്കുന്നതിന് നിയമത്തില്‍ വ്യവസ്ഥയുണ്ടാകണമെന്നും ഹൈക്കോടതി നിരീക്ഷിച്ചു. ഇരട്ടക്കൊലക്കേസില്‍ നീണ്ട കാലമായി ജയിലില്‍ കഴിയുന്ന ആകാശ് സതീഷ് ചണ്ഡാലിയക്ക് ജാമ്യം അനുവദിച്ചാണ് ജസ്റ്റിസ് ഭാരതി ദംഗ്രെയുടെ സിംഗിള്‍ ബെഞ്ച് നിരീക്ഷണം.
തട്ടിക്കൊണ്ടുപോയി മര്‍ദിക്കുന്നതിനിടെ രണ്ട് യുവാക്കള്‍ കൊല്ലപ്പെട്ട സംഭവത്തിലാണ് ഇയാള്‍ എട്ടു വര്‍ഷമായി ജയിലില്‍ കഴിയുന്നത്. കൂട്ടു പ്രതികളായ രണ്ടുപേര്‍ നേരത്തെ ജാമ്യത്തില്‍ ഇറങ്ങിയിരുന്നു. ഇത് ചൂണ്ടിക്കാട്ടിയാണ് ചണ്ഡാലിയക്കും ജാമ്യം അനുവദിച്ചത്.