പൊലീസിന് നേരെ ബോംബാക്രമണം. തട്ടികൊണ്ടുപോകല്‍ കേസില്‍ അറസ്റ്റ് ചെയ്യാനെത്തിയ മംഗലാപുരം പൊലീസിന് നേരെ ആക്രമണം നടത്തിയ കേസിലെ പ്രതി പിടിയില്‍. നാട്ടുകാരാണ് ഇയാളെ പിടികൂടി പൊലീസിന് കൈമാറിയത്. സംഭവത്തിലെ മുഖ്യപ്രതി ഷഫീഖ് ആണ് പിടിയിലായത്. ഇയാളുടെ കൂട്ടാളി അബിനും ഒപ്പമുണ്ടായിരുന്നു. ആര്യനാട്ടെ ഒരു പണി നടന്നുകൊണ്ടിരിക്കുന്ന വീട്ടിലാണ് ഇവര്‍ ഒളിച്ച് താമസിച്ചിരുന്നത്. ഷഫീഖിന്റെ ഒപ്പമുണ്ടായിരുന്ന അബിന്‍ ഓടി രക്ഷപ്പെട്ടു.
പുത്തന്‍തോപ്പ് സ്വദേശിയായ നിഖില്‍ എന്നയാളെ തട്ടികൊണ്ടുപോയ കേസിന്റെ അന്വേഷണവുമായി ബന്ധപ്പെട്ടാണ് പൊലീസ് ഇയാളുടെ വീട്ടിലെത്തിയത്. മംഗലാപുരം സ്വര്‍ണക്കടത്ത് അടക്കമുള്ള കേസുകളില്‍ പ്രതിയാണ് ഇയാള്‍. ഷഫീക്കിനെ തിരഞ്ഞ് പൊലീസ് വീട്ടിലെത്തിയപ്പോള്‍ പ്രതിയും സഹോദരന്‍ ഷമീറും ചേര്‍ന്ന് പൊലീസിന് നേരെ ബോംബെറിഞ്ഞു. ഇവരുടെ അമ്മ പൊലീസിന് നേരെ മഴു എറിഞ്ഞ് ആക്രമിക്കുകയും ചെയ്തു. ഷഫീക്കിന്റെ അമ്മയെയും സഹോദരനെയും പൊലീസ് കസ്റ്റഡിയിലെടുത്തു.