കോഴിക്കോട്: പണത്തോട് ആര്‍ത്തിയില്ലാത്ത മനുഷ്യനായിരുന്നു ഡീഗോ മറഡോണയെന്ന് സ്വര്‍ണ വ്യവസായി ബോബി ചെമ്മണ്ണൂര്‍. ലോകത്തോട് നുണ പറയാത്ത ഒരു മനുഷ്യനുണ്ടെങ്കില്‍ അത് മറഡോണ മാത്രമാണെന്നും ബോബി പറഞ്ഞു. മനോര ന്യൂസ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
‘അദ്ദേഹം പൊട്ടിക്കരയുന്ന ഒരു നിമിഷം ഓര്‍ക്കുകയാണ്. ഭക്ഷണം കഴിച്ച് അല്‍പം മദ്യം കഴിച്ചിരിക്കുമ്പോള്‍, അദ്ദേഹം ഡ്രഗ്‌സ് യൂസ് ചെയ്‌തെന്നു പറഞ്ഞ് കളിയില്‍ നിന്ന് പുറത്താക്കപ്പെട്ടത് ഓര്‍ത്തു. അത് ചതിയാണ് ബോബി, ഞാന്‍ ഇന്നസന്റായിരുന്നു. എന്റെ കാല്‍നഖം പഴുത്ത് കളിക്കാന്‍ പറ്റാതെ ഇരിക്കുമ്പോള്‍ അതിനു മരുന്നു കൊടുത്തപ്പോള്‍ ബാന്‍ഡ് ആയ മരുന്ന് അദ്ദേഹം അറിയാതെ കൊടുക്കുകയും അത് ഒറ്റിക്കൊടുക്കുകയും അത് പിടിക്കപ്പെടുകയും അത് ഫുട്‌ബോള്‍ ലോബിയുടെ ചതിയായിരുന്നുവെന്നു. അതു പറഞ്ഞ് മറഡോണ പൊട്ടിക്കരഞ്ഞു’ – മറഡോണയെ സ്വര്‍ണക്കടയുടെ ഉദ്ഘാടനത്തിനായി കേരളത്തിലെത്തിച്ച ബോബി പറഞ്ഞു.
മറഡോണയുടെ ബാങ്ക് അക്കൗണ്ടില്‍ ഒന്നും കാണില്ല. അദ്ദേഹം ചെക്ക് വാങ്ങില്ല. പണമായി തന്നെയാണ് പ്രതിഫലം വാങ്ങുക. ചിലപ്പോഴൊക്കെ അങ്ങനെ വാങ്ങിയ പണം താമസിക്കുന്ന ഹോട്ടലില്‍ മറന്നു വച്ചു പോകാറുണ്ട്. അങ്ങനെ ഒരുപാട് പണം നഷ്ടപ്പെട്ടിട്ടുണ്ട്. ജീവിതം ആസ്വദിച്ച മനുഷ്യനാണ്. നാളയ്ക്കു വേണ്ടി ചിന്തിക്കാതെ ഇന്ന് ജീവിച്ചു തീര്‍ത്ത മനുഷ്യന്‍. പൈസയ്ക്കു വേണ്ടി ഇത്ര കോടി കിട്ടിയാലേ ഇന്നതു ചെയ്യൂ എന്ന് പിടിവാശിയില്ലാത്തയാള്‍- ബോബി അനുസ്മരിച്ചു.