ന്യൂഡല്‍ഹി: ഫെയ്‌സ്ബുക്കിനായി രാജ്യത്ത് ഏറ്റവുമധികം രാഷ്ട്രീയ പരസ്യത്തില്‍ ചെലവഴിച്ചത് ബിജെപിക്കെന്ന് റിപ്പോര്‍ട്ട്. 2019 ഫെബ്രുവരി മുതല്‍ ആഗസ്റ്റ് 24വരെയുള്ള ഫേസ്ബുക്കില്‍ പരസ്യം നല്‍കുന്നതിനായി കണക്കുകള്‍ പ്രാകരം 4.61 കോടി രൂപയാണ് ബിജെപി ചെലവഴിച്ചത്. കൂടാതെ പരസ്യത്തിനായി പണം ചെലവഴിച്ചവരുടെ പട്ടികയില്‍ ആദ്യ പത്തിലുള്ളവരില്‍ നാലും ബിജെപിയുമായി അടുത്ത ബന്ധം പുലര്‍ത്തുന്നവരുമാണെന്ന് ഇന്ത്യന്‍ എക്സ്പ്രസ് റിപ്പോര്‍ട്ടില്‍ വ്യക്തമാക്കുന്നു.
ബിജെപി നേതൃത്വവുമായും നേതാക്കളുമായും അടുത്ത ബന്ധം പുലര്‍ത്തുന്നവരാണ് പരസ്യത്തിനായി പണം മുടക്കിയിരിക്കുന്നതെന്നാണ് റിപ്പോര്‍ട്ട്. ഡല്‍ഹിലെ ബിജെപി ഹെഡ്ക്വാര്‍ട്ടേഴ്സിന്റെ അഡ്രസാണ് ഇവര്‍ നല്‍കിയിരിക്കുന്നത്.
മൈ ഫസ്റ്റ് വോട്ട് ഫോര്‍ മോദി എന്ന കമ്മ്യൂണിറ്റി പേജ് 1.39 കോടി രൂപ ചെലവഴിച്ചപ്പോള്‍ ഭാരത് കെ മാ കി ബാത്ത് 2.24 കോടിയാണ് പരസ്യത്തിനായി ചെലവഴിച്ചത്. നാഷന്‍ വിത്ത് നമോ 1.28 കോടി രൂപയും ബിജെപി നേതാവ് ആര്‍ കെ സിന്‍ഹയുമായി ബന്ധപ്പെട്ട പേജ് 65 ലക്ഷം രൂപയും എഫ്ബി പരസ്യങ്ങള്‍ക്കായി ചെലവഴിച്ചു. ചെറുതും വലുതുമായ തുകയെല്ലാം കൂടി പരിശോധിക്കുമ്പോള്‍ ബിജെപികേന്ദ്രങ്ങള്‍ ചെലവഴിച്ച തുക 10.17 കോടി രൂപയോളം വരുമെന്നാണ് റിപ്പോര്‍ട്ട്.
അതേസമയം, പ്രതിപക്ഷ പാര്‍ട്ടിയായ കോണ്‍ഗ്രസ് ഈ കാലയളവില്‍ 1.84 കോടിയാണ് മുടക്കിയത്. കോണ്‍ഗ്രസിനായി ചെലവഴിച്ച തുകയുടെ വിവരങ്ങളാണ് റിപ്പോര്‍ട്ടിലുള്ളത്. ഫേസ്ബുക്ക് പരസ്യങ്ങള്‍ക്കായി കൂടുതല്‍ പണം മുടക്കിയ രാഷ്ട്രീയ പാര്‍ട്ടികളുടെ പട്ടികയില്‍ ഡല്‍ഹി ഭരിക്കുന്ന ആം ആദ്മി പാര്‍ട്ടിയുമുണ്ട്. 69 ലക്ഷം രൂപയാണ് ആം ആദ്മി പരസ്യങ്ങള്‍ക്കായി ചെലവഴിച്ചത്.
വിവരങ്ങള്‍ പ്രകാരം 2019 ഫെബ്രുവരി മുതല്‍ ഫേസ്ബുക്കിലെ ഇന്ത്യയുടെ മൊത്തം പരസ്യ ചെലവ് 59.65 കോടി രൂപയാണ്. ഇന്‍സ്റ്റാഗ്രാം, ഓഡിയന്‍സ് നെറ്റ്വര്‍ക്ക്, മെസഞ്ചര്‍ എന്നിവയുള്‍പ്പെടെയുള്ള മറ്റ് ഫെയ്സ്ബുക്ക് പോര്‍ട്ടുകളിലേക്കും പരസ്യം വ്യാപിച്ചിട്ടുണ്ട്.
ഫെയ്‌സ്ബുക്കിന് പുറമെ ന്യൂസ് പ്ലാറ്റ്‌ഫോമായി ഡെയ്ലിഹണ്ടില്‍ ഒരു കോടിയിലധികം രൂപ പരസ്യ വിഭാഗത്തില്‍ ചെലവഴിച്ചിട്ടുണ്ട്. 86.43 ലക്ഷം രൂപ ചെലവഴിച്ച ഇ-കൊമേഴ്സ് പ്ലാറ്റ്‌ഫോം ഫ്‌ലിപ്കാര്‍ട്ടും ഈ വിഭാഗത്തിലെ ആദ്യ പത്തില്‍ ഇടംനേടിയിട്ടുണ്ട്.