റായ്പുര്‍: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ അധിക്ഷേപിച്ച് ബി.ജെ.പി ചണ്ഡീഗഡ് എം.പി സരോജ് പാണ്ഡെ. രാഹുല്‍ഗാന്ധി മന്ദബുദ്ധിയാണെന്നായിരുന്നു സരോജ് പാണ്ഡെയുടെ അധിക്ഷേപം. നേരത്തേയും, നിരവധി വിവാദപരാമര്‍ശങ്ങള്‍ നടത്തിയിട്ടുള്ള എം.പിയാണ് സരോജ് പാണ്ഡെ.
രാഹുല്‍ ഗാന്ധി പല കാര്യങ്ങളും പഠിക്കാന്‍ ശ്രമിക്കുന്നുണ്ട്. പക്ഷേ, അതിന് പ്രായം അദ്ദേഹത്തെ അനുവദിക്കുന്നില്ലെന്നും പാണ്ഡെ പറഞ്ഞു. 40 വയസിന് ശേഷവും പഠിക്കാന്‍ കഴിയാത്ത വ്യക്തിയെ വിദ്യാര്‍ഥി എന്ന് വിളിക്കാന്‍ കഴിയില്ല. ഇത്തരക്കാരെ മന്ദബുദ്ധി എന്നാണ് വിളിക്കേണ്ടതെന്നുമായിരുന്നു സരോജ്പാണ്ഡെയുടെ അധിക്ഷേപം.
കൊക്കോകൊള കമ്പനി ഉടമ മുമ്പ് നാരങ്ങവെള്ളം വിറ്റ് നടന്ന ആളായിരുന്നെന്ന രാഹുല്‍ഗാന്ധിയുടെ പ്രസ്താവനക്ക് മറുപടിയായിട്ടായിരുന്നു സരോജ് പാണ്ഡെയുടെ പ്രസ്താവന. നേരത്തേയും രാഹുല്‍ഗാന്ധിയെ ആക്ഷേപിച്ചിട്ടുള്ള ഇവര്‍ സി.പി.എം പ്രവര്‍ത്തകരുടെ വീട്ടില്‍ കയറി കണ്ണ് ചൂഴ്‌ന്നെടുക്കുമെന്ന പ്രസ്താവനയും നടത്തിയിട്ടുണ്ട്.