പ്രായപൂര്‍ത്തിയാകാത്ത പെണ്‍കുട്ടിയെ ബലാത്സംഗം ചെയ്ത കേസില്‍ യു.പിയിലെ ബി.ജെ.പി. എം.എല്‍.എ കുറ്റക്കാരനെന്ന് കണ്ടെത്തി. സോണ്‍ഭദ്ര ജില്ലയിലെ ദുദ്ദി നിയമസഭാ മണ്ഡലത്തിലെ എം.എല്‍.എയായ രാംദുലാര്‍ ഗോണ്ഡിനെയാണ് എം.പി-എം.എല്‍.എ കോടതി കുറ്റക്കാരനെന്ന് കണ്ടെത്തിയത്. കേസിലെ ശിക്ഷ ഡിസംബര്‍ 15, വെള്ളിയാഴ്ച വിധിക്കും.
2014 നവംബര്‍ നാലാം തീയതിയായിരുന്നു കേസിനാസ്പദമായ സംഭവം. പ്രായപൂര്‍ത്തിയാകാത്ത പെണ്‍കുട്ടിയെ രാംദുലര്‍ ബലാത്സംഗം ചെയ്തെന്ന് ആരോപിച്ച് പെണ്‍കുട്ടിയുടെ സഹോദരനാണ് പരാതി നല്‍കിയത്.
തുടര്‍ന്ന് പോലീസ് രാംദുലാറിനെതിരേ കേസെടുക്കുകയായിരുന്നു. ബലാത്സംഗക്കുറ്റത്തിന് പുറമേ പോക്സോ നിയമത്തിലെ വിവിധ വകുപ്പുകളും ചുമത്തിയാണ് കേസ് രജിസ്റ്റര്‍ ചെയ്തത്.
കേസെടുത്ത സമയത്ത് രാംദുലാര്‍ ഗോണ്ഡ് എം.എല്‍.എയായിരുന്നില്ല. അതിനാല്‍ പോക്സോ കോടതിയിലാണ് കേസിന്റെ വിചാരണ ആരംഭിച്ചത്. പിന്നീട് പ്രതി എം.എല്‍.എ.യായി തിരഞ്ഞെടുക്കപ്പെട്ടതോടെ കേസിന്റെ വിചാരണ എം.പി-എം.എല്‍.എ. കോടതിയിലേക്ക് മാറ്റുകയായിരുന്നു.