ബിരിയാണിയില്‍ പപ്പടവും മുട്ടയുമില്ലെന്നാരോപിച്ച് ഹോട്ടലുടമയ്ക്കും ഭാര്യയ്ക്കും നേരെ ആക്രമണം. തൃശ്ശൂര്‍ കുന്നംകുളം ചൂണ്ടലില്‍ ഹോട്ടല്‍ നടത്തുന്ന ദമ്പതികള്‍ക്കുനേരെയാണ് ആക്രമണമുണ്ടായത്. ആക്രമണത്തില്‍ തിരുവനന്തപുരം സ്വദേശി സുധി (42), ദിവ്യ(40) എന്നിവര്‍ക്കാണ് പരിക്കേറ്റത്. ഇരുമ്പ് വടി ഉപയോഗിച്ച് തലയ്ക്ക് അടിക്കുകയായിരുന്നു.
വെള്ളിയാഴ്ച്ച ഉച്ചയ്ക്ക് ശേഷം മൂന്ന് മണിയോടെയാണ് ആക്രമണം നടന്നത്.
കടയിലെത്തിയ യുവാവ് ബിരിയാണി ആവശ്യപ്പെട്ടു. ബിരിയാണി കൊടുത്തപ്പോള്‍ പപ്പടവും മുട്ടയുംകൂടി ചോദിച്ചു. ഇതോടെ ദിവ്യ മുട്ടയും പപ്പടവും നല്‍കി. തുടര്‍ന്ന് കൈ കഴുകുന്ന സ്ഥലത്തിന് വൃത്തിയില്ലെന്നു പരാതി പറഞ്ഞു. ഇതോടെ ദിവ്യയും യുവാവും തമ്മില്‍ വാക്കുതര്‍ക്കമുണ്ടായി. ഇതിനിടെ യുവാവ് ദിവ്യയെ മര്‍ദിച്ചു. ഭര്‍ത്താവ് സുധി ഇത് ചോദ്യം ചെയ്തതോടെ പ്രതി ഓടി രക്ഷപ്പെടാന്‍ ശ്രമിച്ചു. പിന്തുടര്‍ന്ന സുധിയെ യുവാവ് ഇരുമ്പ് വടികൊണ്ട് തലയ്ക്കടിച്ചു. സംഭവശേഷം പ്രതി ഓടിരക്ഷപ്പെട്ടു. ചൂണ്ടല്‍ പുതുശ്ശേരി സ്വദേശിയാണ് ആക്രമിച്ചതെന്നാരോപിച്ച് പൊലീസില്‍ പരാതി നല്‍കിട്ടുണ്ട്. പൊലീസ് പ്രതിക്കായി അന്വേഷണം ആരംഭിച്ചു.